काठमाडौँ । मेडिकल व्यवसायी दुर्गा प्रसाईँलाई कारबाहीका लागि निर्वाचन आयोगले साइबर ब्युरोलाई पत्राचार गरेको छ।
प्रसाईँले आइतबार भक्तपुरस्थित आफ्नै निवासमा आयोजित पत्रकार सम्मेलनमा गगन थापा पक्षले ५२ करोड रुपैयाँ दिएर निर्वाचन आयोगबाट मान्यता पाएको आरोप लगाएका थिए।
उक्त अभिव्यक्तिले भ्रम फैलाएको ठहर गर्दै आयोगको आइतबार बसेको बैठकले उनीविरुद्ध आवश्यक कानूनी कारबाहीका लागि साइबर ब्युरोलाई पत्र पठाउने निर्णय गरेको हो।
आयोगका एक उच्च स्रोतका अनुसार दुर्गा प्रसाईँले शनिबार पत्रकार सम्मेलनमार्फत विभिन्न व्यक्तिहरूमाथि निराधार आरोप लगाएको विषय आयोगको ध्यानाकर्षणमा आएको थियो। ‘निर्वाचनको संवेदनशील समयमा सार्वजनिक रूपमा यस्ता आधारहीन आरोप लगाउनु निर्वाचन आचारसंहिताविपरीत हुने भएकाले साइबर कानुनअनुसार आवश्यक कारबाहीका लागि निर्णय गरिएको हो,’ स्रोतले भन्यो।
निर्वाचन आयोगले निर्वाचन प्रक्रिया र संस्थामाथि अविश्वास फैलाउने खालका अभिव्यक्तिप्रति कडाइका साथ कारबाही गरिने स्पष्ट पारेको छ।
