काठमाडौँ । राष्ट्रिय प्रजातन्त्र पार्टी (राप्रपा)ले फागुन २१ गते हुने प्रतिनिधिसभा निर्वाचनका लागि काठमाडौँका १० मध्ये ६ वटा निर्वाचन क्षेत्रमा आफ्ना उम्मेदवारहरूको नाम टुङ्गो लगाएको छ।
राप्रपा स्रोतका अनुसार काठमाडौँ निर्वाचन क्षेत्र नं. ३ मा सुन्दरसिंह बोहरा, क्षेत्र नं. ४ मा वरिष्ठ अधिवक्ता डा. सुरेन्द्र भण्डारी, क्षेत्र नं. ५ मा कमल थापा, क्षेत्र नं. ६ मा उद्धवराज भेटवाल, क्षेत्र नं. ८ मा नवीन शाही र क्षेत्र नं. १० मा बलराम थापा उम्मेदवारका रूपमा तय भएका छन्।
यद्यपि काठमाडौँ निर्वाचन क्षेत्र नं. १, २, ७ र ९ मा भने उम्मेदवार चयन हुन बाँकी रहेको छ। ती क्षेत्रमा हाल आन्तरिक छलफल जारी रहेको र छिट्टै निर्णय हुने पार्टी स्रोतले जनाएको छ।
आगामी निर्वाचनलाई लक्षित गर्दै राप्रपाले काठमाडौँमा संगठन सुदृढीकरण र चुनावी तयारीलाई तीव्र बनाएको जनाएको छ।
