काठमाडौंः अमेरिकी महिला लनटेनिस खेलाडी सोफिया केनिनले महिलातर्फको अस्ट्रेलियन ओपनको उपाधि जितेकी छिन् । शनिबार मेलबर्न पार्कमा खेलिएको फाइनलमा केनिनले उपाधिकी प्रबल दाबेदार मानिएकी गार्बिन मुगुरुजालाई २-१ को सेटमा पराजित गरिन् । पहिलो सेट ४-६ ले गुमाएकी १४औं वरियताकी सोफियाले दोस्रो र तेस्रो सेटमा उत्कृष्ट पुनरागमन गरेकी थिइन् । उनले दोस्रो र तेस्रो सेट ६-२, ६-२ ले जितेकी थिइन् ।
२१ वर्षीया सोफियाले सेमिफाइनलमा विश्व नं. १ आश बार्टीलाई पराजित गरेपनि उनले फाइनल जित्ने खासै अड्कल गरिएको थिएन । उनी यो जितसँगै अब विश्व नं. ७ मा उक्लिने छिन् । सन् १९९८ मा मस्कोमा जन्मिएकी सोफियाका मातापिता रुसी हुन् । उनीहरु सन् १९८० को दशकमा अमेरिका बसाइँ सरेका थिए, तर छोरी जन्मिने समयताका उनीहरु रुसमै थिए । तर छोरी जन्मिएसँगै उनीहरु अमेरिकाको फ्लोरिडा फर्किए ।मुगुरुजा यसपटक अस्ट्रेलियन ओपनमा सशक्त उम्मेदवार थिइन् । विगतमा विश्व नं. १ रहेकी मुगुरुजाले सन् २०१६ मा फ्रेन्च ओपन र २०१७ मा विम्बल्डन ओपन जितिसकेकी छिन् ।
पुरुषतर्फको फाइनल आइतबार
आइतबार पुरुषतर्फको फाइनल खेल हुँदैछ । मेलबोर्न पार्कमा हुने यस खेलको फाइनल भिडन्त डिफेन्डिड च्याम्पियन नोभाक जोकोभिक र अस्ट्रियाली २६ वर्षीय खेलाडी डोमिनिक थाइमबीच हुँदैछ । नोभाक आठौं पटक अस्ट्रेलियन ओपनको उपाधि जित्ने अभियानमा छन् ।
