धनुषा। आगामी फागुन २१ गते हुने प्रतिनिधिसभा सदस्य निर्वाचनका लागि धनुषा क्षेत्र नं ३ मा मुख्य निर्वाचन अधिकृतको कार्यालय स्थापना गरिएको छ ।
आज जनकपुरधाम उपमहानगरपालिका–४ स्थित महेन्द्र नारायणनिधि मिथिला संस्कृति केन्द्रमा मुख्य निर्वाचन अधिकृतको कार्यालय स्थापना गरिएको हो ।
मुख्य निर्वाचन अधिकृत सुभाषबाबु पुरीले कार्यालय स्थापना गरिएको जानकारी दिनुभयो । निर्वाचनलाई स्वतन्त्र र शान्तिपूर्ण रूपमा सम्पन्न गराउन राज्यका संयन्त्र लागिपरेका बताउँदै उहाँले निर्वाचनमा सबैको सक्रिय र उत्साहमूलक सहभागिता हुने विश्वास व्यक्त गर्नुभयो । पुरीका अनुसार आज जिल्लाका चारवटै निर्वाचन क्षेत्रमा निर्वाचन अधिकृतको कार्यालय स्थापना गरिएको छ ।
धनुषाका प्रमुख जिल्ला अधिकारी प्रेमप्रसाद लुइँटेलले फागुन २१ गते हुने प्रतिनिधिसभाको निर्वाचनका लागि प्रभावकारी रूपमा सुरक्षा व्यवस्था मिलाइएको कार्यालय जानकारी दिनुभयो । क्षेत्र नं १ मा मतदानस्थल ८५ वटा र मतदान केन्द्र १६३ वटा रहेका छन् ।
यहाँका निर्वाचन अधिकृतमा मनोज बराललाई तोकिएको बताउँदै निर्वाचनको कार्यालय धनुषाधाम रहेकोे मुख्य निर्वाचन अधिकृत पुरीले उल्लेख गर्नुभयो । क्षेत्र नं २ मा ८८ र १७४ मतदान केन्द्र छन् भने यहाँका निर्वाचन अधिकृत दामोदर रेग्मी रहनुभएको छ । क्षेत्र नं २ को निर्वाचनको कार्यालय विदेह नगरपालिका तिनकौरिया चोकमा स्थापना गरिएको छ ।
क्षेत्र नं ३ मा ७४ मतदानस्थल र १५५ मतदान केन्द्र छन् । यहाँका निर्वाचन कार्यालयका मुख्य निर्वाचन अधिकृत सुभाषबाबु पुरीले जिम्मेवारी लिनुभएको छ भने जनकपुरधाम उपमहानगरपालिका–४ स्थित महेन्द्र नारायणनिधि मिथिला संस्कृतिमा केन्द्र तोकिएको छ ।
क्षेत्र नं ४ मा मतदानस्थल ७५ र मतदान केन्द्र १५३ वटा छन् । यहाँका निर्वाचन अधिकृत पुरुषोत्तम खरेल रहनुभएको छ भने निर्वाचनको कार्यालय क्षिलेश्वरनाथ नगरपालिका महेन्द्रनगरमा रहेकोे जनाइएको छ ।
धनुषामा ३२२ मतदानस्थल र ६४५ वटा मतदान केन्द्र रहेका मुख्य निर्वाचन अधिकृत पुरीले जानकारी दिनुभयो । धनुषामा पाँच लाख १४ हजार ५७१ मतदाता रहेका छन् ।
