काठमाडौं — बैंकिङ कसुर मुद्दाका फरार प्रतिवादीलाई प्रहरीले पक्राउ गरेको छ। काठमाडौँ उपत्यका अपराध अनुसन्धान कार्यालय, टेकुले बैंकिङ कसुर मुद्दामा फरार रहेका भक्तपुर जिल्ला अदालतबाट मुद्दा दर्ता भई खोजतलासमा रहेका श्री तामाङलाई पक्राउ गरेको हो।
राजु लामाको जाहेरीका आधारमा नेपाल सरकार प्रतिवादी भई श्री तामाङविरुद्ध बैंकिङ कसुर मुद्दा दर्ता भएको थियो। भक्तपुर जिल्ला अदालतबाट २०८० सालमा पक्राउ पुर्जी जारी भई फरार रहेका उनलाई ललितपुर इमाडोलबाट पक्राउ गरिएको प्रहरीले जनाएको छ। उनी बाह्रबिसे नगरपालिका वडा नम्बर २ का स्थायी बासिन्दा हुन् ।
प्रहरीका अनुसार तामाङविरुद्ध विभिन्न मितिमा भक्तपुर र काठमाडौंका जिल्ला प्रहरी परिसरहरूमा बैंकिङ कसुर मुद्दा दर्ता भएका थिए। अनुसन्धानका क्रममा उनीबाट कुल बिगो रकम रु २ करोड ६६ लाख बराबरको बैंकिङ कसुर भएको खुलेको प्रहरीले जानकारी दिएको छ।
प्रहरीका अनुसार घटनाबारे थप अनुसन्धान जारी रहेको छ।
