काठमाडौं । नेपाली कांग्रेसको विशेष महाधिवेशन स्थल भृकुटीमण्डपमा केही महाधिवेशन प्रतिनिधिहरूले निर्वाचन गर्नुपर्ने मागसहित नाराबाजी गरेका छन् ।
आज विशेष महाधिवेशनको तेस्रो दिन भइसकेकोले नयाँ कार्यसमिति चयन गर्नुपर्ने माग उनीहरुले राखेका छन् । आज पनि बन्द सत्र जारी रहेको छ र निर्वाचन समिति भंग गरेर नयाँ निर्वाचन समिति गठन गरिएको छ ।
सो समितिले दिउँसो १ बजेदेखि नयाँ कार्यसमितिको निर्वाचन गर्ने कार्यतालिका बनाएको छ । समितिको कार्यतालिका बमोजिम नै निर्वाचन गर्नुपर्ने माग गरेर केही प्रतिनिधिहरुले नाराबाजी सुरु गरेका छन् । उनीहरुले वर्तमान केन्द्रीय कार्यसमिति भंग गर नयाँ नेतृत्व चयन गर लगायतका नारा लगाउँदै नाराबाजी गरेका हुन् ।
उता सहमतिको प्रयासस्वरूप संस्थापन पक्ष र विशेष महाधिवेशन पक्षधरबीच आज बिहानदेखि सुरु भएको वार्ता अहिले स्थगित भएको छ । उक्त वार्ता विना निष्कर्ष टुंगिएको थियो ।
नेपाली कांग्रेसको संस्थापन र विशेष महाधिवेशन पक्षबीच पहिलो चरणको वार्ता सकिएको बताइएको छ ।
भृकुटीमण्डपमा विशेष महाधिवेशनको बन्द सत्र जारी रहँदा लाजिम्पाटको एउटा घरमा संस्थापन र विशेष महाधिवेशन पक्षका नेताहरूबीच बिहानदेखि जारी छलफलको पहिलो चरण सकिएको र आजै केही बेरपछि अर्काे चरणको वार्ता गरिने विशेष महाधिवेशनको पक्षका एक नेताले जानकारी दिए ।
सो वार्तामा विशेष पक्षकाले आफ्ना अडानहरू राखेका थिए र ती अडानबाट पछि नहट्ने भनेपछि अहिलेका लागि वार्ता सकिएको घोषणा गरिएको हो ।
पूर्णबहादुर खड्कालाई जेठसम्म कार्यवाहक दिनुपर्ने, सभापति देउवाको हस्ताक्षर नचल्ने र उनी चुनाव पनि नलड्ने अडान विशेष पक्षको अडान छ । साथै विशेष महाधिवेशनलाई पार्टीले स्वीकार गर्दै त्यहाँबाट पारित दस्तावेज कार्यान्वयन गर्नुपर्ने अडान विशेष पक्षको थियो ।
अहिले पनि संस्थापन र इतर पक्षका नेता डा शेखर कोइरालाका तर्फबाट वार्तामा बासेका प्रतिनिधिहरु वार्ता सकिएलगत्तै सभापति देउवाको निवास महाराजगञ्जतर्फ लागेका छन् ।
तस्बिरः हरिराम भेटुवाल/रासस
