काठमाडाैंः प्रधानसेनापति पूर्णचन्द्र थापाको औपचारिक निमन्त्रणामा बंगलादेशका सेना प्रमुख जनरल अजिज अहमद शुक्रबार काठमाण्डौ आइपुगेका छन् । उनलाई त्रिभुवन अन्तर्राष्ट्रिय विमानस्थलमा राष्ट्रिय सुरक्षा परिषद्को सचिवालयका उपरथी निर्मल कुमार थापाले स्वागत गरेकाे नेपाली सेनाले जनाएकाे छ ।
श्री अजिजले शनिबार टुंडिखेलस्थित सैनिक मञ्चमा रहेको वीर स्मारिकामा माल्यार्पण गर्ने तथा जङ्गी अड्डा परिसरमा नेपाली सेनाको एक टुकडीले उनकाे सम्मानमा सम्मान गारत अर्पण गर्ने कार्यक्रम रहेको छ । नेपाल भ्रमणका क्रममा उनले पोखरास्थित पश्चिम पृतना हे.क्वा. तथा केही महत्वपूर्ण पर्यटकीय स्थलहरुको समेत भ्रमण गर्ने कार्यक्रम रहेको नेपाली सेनाले जनाएकाे छ ।
उनले माघ २६ गते प्रधानमन्त्री के.पी. शर्मा ओली, उपप्रधानमन्त्री तथा रक्षामन्त्री ईश्वर पोखरेल तथा प्रधानसेनापति पूर्णचन्द्र थापासँग भेटवार्ता गर्ने कार्यक्रम रहेको सेनाले जारी गरेकाे विज्ञप्तिमा उल्लेख छ । साथै, सेना प्रमुख अजिजले राष्ट्रपति विद्यादेवी भण्डारीसँग भेटवार्ता गर्नुका साथै नेपाली सेनाको पाँचखालस्थित वीरेन्द्र शान्ति कार्य तालिम केन्द्रको भ्रमण गर्नुहुने कार्यक्रम रहेको छ । पाँच दिने औपचारिक भ्रमण पुरा गरी सेना प्रमुख अजिज माघ २८ गते स्वदेश फिर्ता हुने कार्यक्रम रहेको छ ।
नेपाली सेनाले यस किसिमको उच्च तहको सैनिक नेतृत्वकाे भ्रमणले नेपाली सेना र मित्रराष्ट्र बंगलादेशी सेनाबीच रहँदै आएको आपसी सौहार्द्रपूर्ण सम्बन्धको साथै द्विपक्षीय हित र पारस्परिक सम्बन्धलाई थप सुमधुर एवम् प्रगाढ बनाउन मद्दत पुग्ने विश्वास लिएको छ ।
