काठमाडौं । वरिष्ठ पत्रकार तथा बीपी विचारका अभियन्ता होमनाथ दाहालको ८४ वर्षको उमेरमा निधन भएको छ। दाहालको बिहिबार साँझ वीर अस्पतालमा उपचारका लागि पुर्याइँदै गर्दा निधन भएको बरिष्ठ पत्रकार पुरुषोत्तम दाहालले जानकारी दिनुभयो ।
ओखलढुंगा जिल्लाबाट पूर्व सांसद तथा पूर्व मन्त्री रहनु भएका दाहाल नेपाल पत्रकार महासंघका पूर्व सभापति समेत हुनुहुन्थ्यो। पत्रकारिता र लोकतान्त्रिक आन्दोलनमा उहाँले पुर्याउनुभएको योगदान उल्लेखनीय मानिन्छ।
केही समयदेखि अस्वस्थ रहनु भएका दाहालको निधनले पत्रकारिता क्षेत्र र लोकतान्त्रिक आन्दोलनलाई अपूरणीय क्षति पुगेको छ।
दाहालकी धर्मपत्नी सुधा दाहाल हाल वीर अस्पतालमै उपचाररत हुनुहुन्छ। उहाँका दुई छोरा डा. सुधाम्शु दाहाल र हिमाम्शु दाहाल हुनुहुन्छ।
दिवंगत दाहालको आजै पशुपति आर्यघाटमा अन्त्येष्टि गरिने परिवारले जनाएको छ।
