काठमाडौं । राष्ट्रिय प्रजातन्त्र पार्टी (राप्रपा)ले पार्टीका संस्थागत निर्णयविरुद्ध सामाजिक सञ्जाल र सञ्चारमाध्यममा भइरहेको अनर्गल प्रचारप्रति गम्भीर ध्यानाकर्षण भएको जनाएको छ।
आज पार्टीको केन्द्रीय कार्यालय धुम्बाराहीमा बसेको केन्द्रीय पदाधिकारी बैठकले केन्द्रीय कार्यसम्पादन समितिबाट सर्वसम्मत र संस्थागत रूपमा भएका निर्णयलाई लिएर भ्रम फैलाउने, जथाभावी अभिव्यक्ति दिने तथा कार्यकर्ता विभाजित गर्ने गतिविधि पार्टीको हितविपरीत भएको निष्कर्ष निकालेको हो।
बैठकपछि जारी विज्ञप्तिमा विषम परिस्थितिमा पनि पार्टीको लोकप्रियता बढ्दै गएको, देशले बलियो राष्ट्रवादी शक्तिको खोजी गरिरहेको तथा निर्वाचन नजिकिँदै गएको सन्दर्भमा यस्ता गतिविधि अवाञ्छित हुने उल्लेख गरिएको छ। राप्रपाले पार्टीप्रति भ्रम फैलाउने कुनै पनि कार्यमा संलग्न नहुन समग्र पार्टी पंक्तिलाई आग्रह गरेको छ।
पार्टीले संस्थागत रूपमा गरेका निर्णयको स्वामित्व हरेक तहका सदस्यले लिनु आफ्नो कर्तव्य, धर्म र जिम्मेवारी भएको पनि स्मरण गराइएको छ।
