काठमाडौँ । अन्तरिम सरकारका वन तथा वातावरणमन्त्री माधवप्रसाद चौलागाईंले विकास आयोजनाहरुलाई सहजीकरण गर्न अहिलेको सरकार तत्पर रहेको बताउनुभएको छ ।
शुक्रवार ललितपुरमा आयोजित कार्यक्रमलाई सम्बोधन गर्दै उहाँले यस्तो बताउनुभएको हो । उहाँले यसबारे सरकारका हालैका काम कारबाहीले पनि संकत गर्ने बताउनु भयो । उहाँले विगतमा विभिन्न कारणले हेलचेक्र्याईं गरिएका, जनताप्रति उत्तरदायी नभएर गरिएका योजनाहरुबाट जनताले धेरै दुःख पाइरहेको बताउनु भयो । विगतको सिकाईबाट अहिले नागरिकले पाउने सेवामा सहजता प्रदान गरिरहेको उहाँको दाबी छ ।
मन्त्री चौलागाईंले भन्नुभयो, ‘विकास आयोजनाहरुलाई सहजीकरण गर्न अहिलेको सरकार तत्पर छ । तपाईंहरुले यसको धेरै संकेत पाउनुभयो पनि होला । काम पनि भइरहेको छ । विगतमा विभिन्न कारणले हेलचेक्र्याईं गरिएका, जनताप्रति उत्तरदायी नभएर गरिएका कार्यक्रमले धेरै दुःख भएको छ । अहिले यसलाई विगतको सिकाईबाट कसरी सहजीकरण गर्ने भन्नेकुरा अहिलेको सरकारको सोच छ । त्यसतर्फ हामी काम गर्नेछौँ ।’
मन्त्री चौलागाईंले अनावश्यक झैझगडाबाट मुक्त हुने र सरकारलाई सुशासित बनाउने अहिलेको सरकारको म्याण्डेट रहेको बताउनु भयो ।
