काठमाडौं । पूर्वप्रधानमन्त्रीत्रयलाई प्रधानमन्त्री सुशीला कार्कीले फागुन २१ गते हुने निर्वाचनलाई जसरी पनि सफल पार्न आग्रह गर्नुभएको छ ।
बालुवाटारमा भएको छलफलमा प्रधानमन्त्री कार्कीले यस्तो आग्रह गर्नुभएको हो । उहाँले आफनो निमन्त्रणलाई स्वीकार आइदिएकोमा धन्यबाद दिदै निर्वाचनका लागि वातावरण बनिरहेको जनाउनु भएको छ ।
प्रधानमन्त्री कार्कीले भन्नुभयो “यो घर तपाईँहरूकै हो। म त न्याय क्षेत्रको मान्छे। राष्ट्रपतिज्यूबाट चुनाव गराउने कार्यादेश पाएबमोजिम हामी चुनावको तयारी गरिरहेका छौँ।”
उहाँले भन्नुभयो “प्रशासनिक काम–कारबाहीबाट अलग भएर पूरै निर्वाचनमा होमिनकै लागि रक्षाबाहेक मसँग रहेका सबै मन्त्रालय अन्य मन्त्रीलाई जिम्मा लगाइसकेको छु।”
उहाँले भन्नुभयो “मैले यहाँहरूलाई बोलाएर बिन्ती गर्न खोजेको के भने यो निर्वाचन जसरी पनि सफल पारौँ। सबै यसमा सहभागी हुनुपर्छ। तपाईँहरू निर्वाचनका लागि तयारै हुनुहुन्छ भन्ने नै मैले देखेकी छु। त्यस्तो वातावरण बनिरहेको देख्छु। यो स्वागतयोग्य छ।”
हामीले निर्वाचन आयोग र प्रहरी प्रशासनलाई आवश्यक स्रोतसाधन उपलब्ध गराएका जानकारी गराउदै उहाँले भनेजति नै स्रोतसाधनको व्यवस्था गरेका पनि बताउनु भयो ।
उहाँले भन्नुभयो “सुरक्षाकर्मीको मनोबल बढेको कुरा त यहाँहरुले पनि महसुस गर्नुभएकै होला। हामी त्यसरी काम गरिरहेका छौँ। अब कुनै अलमल नगरी यो राष्ट्रको भविष्य सम्झेर, स्थिर र दिगो लोकतन्त्रको सुनिश्चितताका लागि चुनाव सफल पारौँ। यो हामी सबैको जिम्मेवारी हो। यत्ति अनुरोध गर्न मैले यहाँहरूलाई आज निम्ता गरेकी हुँ।”
