म्याग्दी। प्रदेश अस्पताल बेनीमा शल्यक्रियामार्फत गरिने प्रसूति र सर्जरी सेवा करिब एक महिनापछि सञ्चालन भएको छ ।
प्रदेश सरकारले खटाएका शल्यक्रियामार्फत गरिने प्रसूति र सर्जरीको पनि शल्यक्रिया सेवा दिनसक्ने एमजिडिपी डाक्टर मङ्गलबार अस्पतालमा हाजिर भएसँगै सेवा सञ्चालन भएको हो ।
विशेषज्ञ चिकित्सक अभावमा कात्तिक १५ गतेदेखि शल्यक्रियामार्फत गरिने प्रसूति तथा मङ्सिर १ गतेदेखि ‘हाइड्रोसिल’, ‘एपेण्डिस’ र ‘हर्निया’को शल्यक्रिया सेवा बन्द भएको थियो ।
स्वास्थ्य मन्त्रालयको सिफारिसमा मुख्यमन्त्री तथा मन्त्रिपरिषद् कार्यालयले धौलागिरि अस्पताल बागलुङबाट नवाँै तहका डा हेमन्त बास्तोलालाई मङ्सिर १० गते बेनीमा सरुवा गरेको थियो । एमजिडिपी डाक्टर आएपछि बन्द भएका शल्यक्रियासम्बन्धी सेवा सञ्चालन भएको प्रदेश अस्पताल बेनीका निमित्त प्रमुख समीर भण्डारीले बताउनुभयो ।
सर्जरी र शल्यक्रियामार्फत गरिने प्रसूति सेवाका लागि समय र रकम खर्च गरेर जिल्ला बाहिर जानुपर्ने अवस्था सिर्जना भएको थियो । बेनी अस्पतालबाट म्याग्दी, मुस्ताङ, पर्वतको जलजला, बागलुङको तमानखोला गाउँपालिकाका बासिन्दाले सेवा लिने गरेका छन् ।
गत भदौ महिनादेखि बेनीलगायत गण्डकी प्रदेश सरकार मातहतका अस्पतालको व्यवस्थापन समिति नेतृत्वविहीन छ । सम्बन्धित जिल्लाको समन्वय समितिका प्रमुख समितिको अध्यक्ष रहने कार्यविधि खारेज भएपछि अस्पताल नेतृत्वविहीन भएका हुन् ।
म्याग्दी १(क) बाट निर्वाचित प्रदेशसभा सदस्य हरिबहादुर भण्डारीले कात्तिक अन्तिम साता बसेको प्रदेशसभाको बैठकमा शून्य समयमा प्रदेश अस्पतालको विकास समिति र प्रदेश अस्पताल बेनीको प्रशासनिक नेतृत्व नहुँदा देखिएका समस्याका विषयमा सरकारको ध्यानाकर्षण गराउनुभएको थियो ।
बेनी अस्पतालले अन्तरङ्ग र बहिरङ्गसहित हाडजोर्नी, दन्त, आँखा, बच्चा उपचार कक्ष, हिंसा प्रभावितका लागि अल्पकालीन सेवा केन्द्र, डायलासिस सेवा सञ्चालन गर्दै आएको छ । मेडिसिन, दन्तरोग, मनोसामाजिक विशेषज्ञ र ११ जना मेडिकल अधिकृत कार्यरत छन् ।
वार्षिक ६० हजारभन्दा बढीले सेवा लिने बेनी अस्पतालको विसं २०७४ देखि सुरु भएको भवन निर्माणले पूर्णता नपाउनु र दरबन्दीअनुसारका चिकित्सक तथा स्वास्थ्यकर्मी नहुनु मुख्य चुनौती बनेको छ । बेनी अस्पताललाई विसं २०७२ मा १५ बाट ५० श्यया क्षमतामा स्तरोन्नति गरिएको थियो ।
