काठमाडौँ । उज्यालो पार्टी नेपाल र हाम्रो पार्टी नेपाल आगामी निर्वाचनमा एउटै चुनाव चिन्हबाट प्रतिस्पर्धा गर्ने भएका छन्।
हाम्रो पार्टी नेपालका अध्यक्ष खगेन्द्र सुनार र उज्यालो पार्टी नेपालका अनुपकुमार उपाध्यायले संयुक्त रूपमा एकल चुनाव चिन्ह प्राप्त गर्न निर्वाचन आयोगमा आवेदन दिएका थिए।
दुवै दलले सामूहिक रूपमा निर्वाचनमा जाने निर्णय गरेसँगै आयोगले उनीहरूको मागअनुसार एकल चुनाव चिन्ह प्रदान गर्ने तयारी गरेको छ। आयोगका अनुसार दुवै दलको संयुक्त निवेदनअनुसार नै ‘बलेको चिम’ चुनाव चिन्ह तोकिएको छ।
यसअघि उज्यालो पार्टी नेपालले ‘बिजुलीको चिम’ र हाम्रो पार्टी नेपालले ‘लाइक’ चिन्ह उपयोग गर्दै आएका थिए। अब भने गठबन्धनस्वरूप निर्वाचनमा जाने रणनीतिअनुसार साझा चिन्ह ‘बलेको चिम’ प्रयोग गर्नेछन्।
दुवै दलका नेताहरूका अनुसार एउटै चिन्हले मतदातामाझ स्पष्टता र प्रभावकारी अभियान सञ्चालनमा मद्दत गर्ने विश्वास लिइएको छ।
