काठमाडौं। नेपाल सरकार र अमेरिकी मिलेनियम च्यालेन्ज कर्पोरेसन (एमसीसी) बीच गरिएको एमसीसी नेपाल कम्प्याक्टमा अमेरिकाले अतिरिक्त ५ करोड अमेरिकी डलर (करिब ७ अर्ब रुपैयाँ) अनुदान थप गर्ने घोषणा गरेको छ।
यससँगै परियोजनाअन्तर्गत उपलब्ध कुल रकम ७४ करोड ७० लाख अमेरिकी डलर (करिब १ खर्ब ६ अर्ब रुपैयाँ) पुगेको छ। सो मध्ये अमेरिकाको कुल योगदान ५५ करोड डलर तथा नेपाल सरकारको १९ करोड ७० लाख डलर रहनेछ।
अतिरिक्त प्राप्त स्रोतले प्राथमिकताप्राप्त विद्युत् प्रसारण लाइनहरू निर्माणसँगै नेपालको ऊर्जा प्रणाली सुदृढीकरण तथा क्षेत्रीय ऊर्जा व्यापार विस्तारमा टेवा पुर्याउने एमसीसीका मुख्य उद्देश्यहरू पूरा गर्न महत्वपूर्ण योगदान पुर्याउने अपेक्षा गरिएको छ। ऊर्जा ग्रिडको विश्वसनीयता, अन्तर्राष्ट्रिय ऊर्जा कनेक्टिभिटी र बजार पहुँच सुधारमार्फत अमेरिकी उत्कृष्ट प्रविधि तथा असल कार्यप्रणालीलाई प्रवर्द्धन गर्ने अवसर पनि यसले बढाउनेछ।
यसबाहेक, परियोजनाले अमेरिकी प्रविधि तथा कम्पनीहरूका लागि नेपाली बजारमा प्रवेश गर्ने सम्भावनासमेत विस्तार गर्नेछ। एमसीसी कम्प्याक्टका माध्यमबाट प्राप्त यो आर्थिक सहयोगले अमेरिका–नेपालबीचको दीर्घकालीन साझेदारी, ऊर्जा सुरक्षा, आर्थिक वृद्धि र पारस्परिक समृद्धिलाई मजबुत बनाउँदै आएको सम्बन्धलाई थप सुदृढ पार्ने बताइएको छ।
