काठमाडौं । महानगरीय प्रहरी परिसरले उपत्यकामा रहेका सबै घुमुवा प्रहरीलाई हटाएको छ । काठमाडौं, ललितपुर र भक्तपुरमा लामो समयदेखि सादा पोसाकमा कार्यरत १७ अधिकृत र ५७ जवानसहित ७४ जनालाई सो जिम्मेवारीबाट हटाइएको हो । उनीहरूले उल्लेखनीय कार्य गर्न नसकेका कारण सादा पोसाकको जिम्मेवारीबाट हटाई २ नम्बर प्रहरी गण महाराजगञ्जमा सरुवा गरिएको छ । महानगरीय प्रहरी आयुक्त विश्वराज पोखरेलले घुमुवाविरुद्ध उजुरी परेपछि सरुवा गरिएको जानकारी दिए ।
आचरण व्यवहार सुधारको हिसावले पठाइएका उल्लेखित अधिकृत तथा जवानहरूलाई महानगरीय प्रहरी शिक्षालय महाराजगंजमा ७ दिने सुधारत्मक तालिम समेत सञ्चालन गरिने पनि भएको छ । उनीहरूलाई अब घुमुवालाई अपराध अनुसन्धान र नियन्त्रण प्रयोजनका लागि मात्रै खटाइने पोखरेलले बताए । उनका अनुसार प्रहरीको आचरण, व्यवहार सुधारका लागि ७ दिने तालिम सुरु गर्न लागिएको पनि जानकारी दिए । ‘इन्टेलिजेन्ट ग्रुप’मा कार्यरत हुने कर्मचारीहरूमा सकारात्मक आचरण व्यवहारमात्र नभएर तोकिएको जिम्मेवारीभित्र रहेर परिणाममुखी कार्यको हरेक महिना मूल्यांकन हुने परिपाटीको थालनी गरिने डीआईजी पोखरेलले बताए ।
साथै अव सादा पोसाकमा कार्यरत प्रहरी अधिकृत तथा जवानहरू मुलतःप्रतिबन्धित समूहको गतिविधि नियन्त्रण तथा जघन्य प्रकृतिका अपराध नियन्त्रण, रोकथाम र अनुसन्धानमा मात्र परिचालित हुने छन् । सौर्य दैनिक
