फ्रान्स। फ्रान्सको एट्लान्टिक टापु ओलेरोनमा बुधबार एक ३५ वर्षीय व्यक्तिले आफ्नो कारले पैदल यात्री र साइकल चालकहरूलाई जानाजानी ठक्कर दिँदा कम्तीमा १० जना घाइते भएका छन् ।
“ओलेरोनका बासिन्दाले पश्चिमी शहर ला रोशेलको सुन्दर टापुको मुख्य सडकमा ‘जानाजानी’ धेरै पैदल यात्री र साइकल चालकलाई ठक्कर दिएका थिए,”अभियोजक अर्नाउड लारेजले भन्नुभयो।
प्रहरीले आक्रमणकारी कार चालकलाई पक्राउ गरी अनुसन्धान सुरू गरिसकेको छ। आक्रमणकारीले कार हमलासँगै अरबी भाषामा ‘भगवान सबैभन्दा महान हुनुहुन्छ’ भन्दै चिच्याएका लारेजले बताउनुभयो । उहाँले भन्नुभयो,“यस्ता अभिव्यक्ति प्रायः इस्लामवादी चरमपन्थीहरूले प्रयोग गर्छन्।”
“प्रहरीले ती व्यक्तिलाई पक्राउ गरेको छ र ‘हत्याको प्रयास’ को आरोपमा अनुसन्धान गरिरहेको छ, तर ती व्यक्तिको आक्रमणको उद्देश्य तत्काल स्पष्ट भएको छैन,” लारेजले भन्नुभयो ।
यस मुद्दालाई अनुसन्धान गरिरहेको एक स्रोतले भन्यो, “ती व्यक्तिले धेरै किलोमिटरसम्म पैदल र साइकल यात्रीलाई ‘जानाजानी’ ठक्कर दिएको देखिएको छ।”
अभियोजनकर्ताले भनेका छन्, “डोलुस डी ओलेरोन र सेन्ट–पियरे डी ओलेरोन शहरहरू जोड्ने सडकमा उक्त घटना भएको थियो।” डोलुस डी ओलेरोनका मेयरले आक्रमणकारी ‘संदिग्ध बासिन्दा’ भएको पुष्टि गर्नुभयो ।
