काठमाडौं । सरकारले उपत्यकाका विभिन्न ५ ठाउँमा शुक्रबारदेखि सुपथ मूल्यका पसल खोल्ने भएको छ । विभिन्न ५ स्थानमा चाडबाडको बेलामा जस्तै खोलिने सुपथ मूल्यको पसल खोल्ने तयारी गरिरहेको आपूर्ति मन्त्री लेखराज भट्टले बताए । शुक्रबारदेखि साल्ड ट्रेडिङले यस्ता पसल खोल्न लागेको हो । मन्त्री भट्टाले खाद्यान्न ४ देखि ६ महिनासम्मलाई पुग्ने अवस्थामा रहेको पनि बताए । यस्तै ८ महिनासम्मलाई पुग्ने औषधि, १० महिनासम्मका लागि पुग्ने नुन र ३ महिनासम्मका लागि पर्याप्त चिनी पनि रहेको मन्त्री भट्टले बताए । उनले स्वास्थ, गृह र अपूर्ति मन्त्रालयले उपत्यका बाहिर पनि बजार अनुगमन गरिरहेको जानकारी दिए ।
त्रसित भएर घरघरमा खाद्यान्न र अत्यावश्यक वस्तु सञ्चित गर्नु नपर्ने स्पष्ट पारेको छ । नियमित बजार अनुमगनसहित कृत्रिम अभाव र भ्रम सिर्जना गर्नेलाई कारबाही प्रारम्भ गरेको सरकारले आगामी चारदेखि ६ महिनासम्म पुग्ने खाद्यान्न भण्डारण रहेकाले अभाव हुने आशंकाले चाहिनेभन्दा बढी सामान खरिद नगर्न सरकारले सबैमा आग्रह गरेको हो । मन्त्री भट्टले पेट्रोलियम पदार्थको पर्याप्त भएको उल्लेख गर्दै व्यवस्थापनमा मात्रै समस्या रहेको बताए । उनले भने, ‘खाद्य १ क्वीन्टल लिनेले १० क्वीन्टल पनि लिएका छन् । ग्यास पनि यस्तै भएको छ । जनताको घरमा छापा मार्नेस्थिति हुन्न राज्यको ।’
बजारका सिटामोलको माग बढेको मन्त्री भट्टको भनाइ थियो । मास्क र ह्यान्ड स्यानिटाइजर मागअनुसार आपूर्ति गर्न नसकेको मन्त्री भट्टको भनाइ छ । ग्यास कालोबजारी गर्नेबाट फागुनयता ५६ लाख ३० हजार जरिवाना भराइएको उनले जानकारी दिए । चीनबाट आउने तरकारीजन्य वस्तुमा मात्रै मूल्य बढेको र अन्यमा समान्य नै रहेको मन्त्री भट्टले बताए । मन्त्री भट्टले पेट्रोलियम पदार्थको आपूर्तिमा कुनै समस्या नरहेको जनाउँदै केही ग्यास उद्यमीमा देखिएको समस्यालाई ध्यान दिएर सरकारले आयात सहज नबनाए उद्यमीलाई कारबाही गर्न चेतावनी दिए ।
उनले गत २०७६ माघ महिनादेखि हालसम्म विभिन्न उद्यमी र व्यवसायीलाई कालोबजारी र अन्य कसुरमा कारबाही गरी ५६ लाख जरिवाना असुल गरिएको बताए । मन्त्री भट्टले ग्यास र पेट्रोलियम पदार्थ आवश्यकताभन्दा बढी खरिद गरेर घरमा भण्डारण गर्दा दुर्घटनासमेत हुन सक्नेतर्फ सचेत गराउँदै इन्डक्सन चुलो र बिजुलीको प्रयोग बढाएर पनि आवश्यकता पूरा गर्न सकिने स्पष्ट गरे ।
औषधि पसलहरूले जति माग्यो त्यति मात्रामा दिने प्रक्रियाका कारण सिटामोलको माग बढेको उल्लेख गर्दै आवश्यकतानुसार माक्स र सेनेटाइजरको आपूर्ति बढाइएको जानकारी दिए । मन्त्री भट्टले विपद्को अवस्थामा सञ्चारमाध्यमले आम जनतालाई सुरक्षित र सुसूचित गराउन भूमिका खेल्नुुपर्नेमा पनि जोड दिए । सौर्य दैनिक
