जनकपुरधाम। कृषिक्षेत्रमा उल्लेखनीय कार्य, उत्पादन तथा उपलब्धि गरेबापत मधेस प्रदेशका आठ जिल्लाका आठ जना किसानलाई सम्मान गरिएको छ ।
विश्व खाद्य दिवसका अवसरमा आज जनकपुरधाममा ‘स्वच्छ खाना तथा सुखद भविष्यका लागि हातोमालो’ भन्ने नारासहित आयोजना गरिएको समारोहमा प्रदेशका आठ जना किसानलाई नगद, सम्मानपत्रसहित दोसल्ला ओढाएर सम्मान गरिएको हो ।
मधेस प्रदेशको कृषि विकास निर्देशनालयद्वारा आयोजित कार्यक्रममा धनुषाको मिथिला नगरपालिका–८ का तरकारी किसान छविलाल महतो, महोत्तरी पिपरा–४ का दलहन किसान अरुण ठाकुर, सप्तरी अग्निसाइडर कृष्णासवरण–२ का फलफूल किसान महावीरप्रसाद चौधरी, बाराको जीतपुर–१८ का मकै किसान विनिता गौतम, पर्सा विन्दवासिनी–४ का च्याउ किसान सुजितकुमार चौरसिया, सर्लाही बागमती नगरपालिका–११ का मौरी किसान मणिप्रसाद पाण्डे, सिरहा नगरपालिका–२ का खाद्यान्न बीउ उत्पादक किसान बलराम यादव र रौतहटको कटहरिया नगरपालिका–५ का धान उत्पादक किसान रामसिंह राय यादव सम्मानित हुनुभएको हो ।
सो अवसरमा भूमि व्यवस्था, कृषि तथा सहकारी मन्त्रालयका सचिव डा उमेश दाहालले सम्मानित किसानलाई नगद रु २५ हजार, दोसल्लासहित सम्मानपत्र प्रदान गर्नुभयो ।
उहाँले मधेस खाद्यान्नका लागि महत्त्वपूर्ण रहेकाले कृषि क्षेत्रको विकासमा सबैले आ–आफ्नो क्षेत्रबाट सहयोग गर्न आग्रह गर्नुभयो । कृषि निर्देशनालयका प्रमुख जितेन्द्र यादवको अध्यक्षतामा कार्यक्रम सम्पन्न भएको थियो ।
