तनहुँ । पछिल्ला वर्षहरूमा तनहुँको मानुङकोट देश–विदेशका पर्यटकका लागि आकर्षक गन्तव्य बन्दै गएको छ ।
दमौली बजारदेखि झण्डै १२ किलोमिटर दूरीमा अवस्थित यो पहाडी गाउँबाट देखिने सूर्योदय र हिमालको दृश्यले आगन्तुकलाई मन्त्रमुग्ध पार्ने गरेको छ ।
मानुङकोटको मुख्य आकर्षण बिहानको सुर्योदयसँगै देखिने अन्नपूर्ण, माछापुच्छ्रे र मनास्लु हिमशृंखला हो । एकाबिहानै कुहिरोले दमौली बजारलाई ढाक्दा अझ सुन्दर दृश्य देखिन्छ ।
दमौली बजारलाई कुहिरोले ढाक्नुलाई पौराणिक कथासँग पनि जोडिएको छ । परापूर्वकालमा महर्षि वेदव्यासका पिता पराशर ऋषिले सत्यवतीसँग सम्भोग गर्न इच्छा प्रकट गर्दा लोकलाई पत्तो नहोस् भनेर कुहिरो उत्पन्न गराइदिएको धार्मिक किंवदन्ती रहँदै आएको छ ।
मानुङकोटबाट धौलागिरी, माछापुच्छ्रे अन्नपूर्ण, मनास्लु, लमजुङ हिमालको दृश्यावलोकन गर्न सकिन्छ । मानुङकोटमा पर्यटक बढेपछि गाउँ छाडेर सहर झरेकाहरु पनि पुनः मानुङकोट उक्लिएर व्यवसाय थालेका छन् ।
दमौली–मानुङकोट सडक सुधारसँगै यहाँको पर्यटनले थप गति पाउने अपेक्षा गरिएको छ । सामाजिक सञ्जालमा फैलिएका सूर्योदय र कुहिरोको तस्वीरहरूले पनि मानुङकोटलाई देशका युवा यात्रुहरूको नयाँ ‘भाइरल डेस्टिनेशन’ बनाइदिएको छ ।
तस्बिरः न्यूजपोलार
