काठमाडौं । यमपञ्चक अर्थात तिहारको मुख्य दिन आज भाइटीका मनाइँदै छ । दिदीबहिनीले दाजुभाइलाई भाइटीका लगाउन सुरु भइसकेको छ । शुभसाइत बिहान ११ बजेर ३९ मिनेटमा भए पनि कतिपयले बिहानैदेखि टीका लगाउन सुरु गरेका हुन् ।
दिदीबहिनी नहुनेहरु आज रानीपोखरीस्थित बालगोपालेश्वर मन्दिरमा पुगेर टीका लगाइरहेका छन् । यो मन्दिर प्रत्येक वर्ष भाइटीकाका दिने खुलाउने चलन छ ।
बालगोपालेश्वर मन्दिर वर्षमा एकपटक आजैका दिनमात्र खुल्ने गर्दछ । दिदीबहिनी एवं दाजुभाइ नहुने भाइटीकाका दिन यसै मन्दिरमा गई पूजा, दर्शन गरी टीका लगाउने गर्दछन्।
यसैगरी जयवागेश्वरीमा रहेको खञ्जनेश्वर महादेव मन्दिरमा पनि आज दिदीबहिनी एवं दाजुभाइ नहुनेले पूजा तथा दर्शन गरी टीका लगाउने प्रचलन रहेको छ ।
वि.सं २०३५ अघि रानीपोखरीभित्रको बालगोपालेश्वर मन्दिरमा प्रवेशका लागि पोखरीमा मानिस हामफाल्ने समस्या रहेकाले बन्द गरिन्थ्यो ।
त्यसबेला जयबागेश्वरीको खञ्जनेश्वर महादेव मन्दिरमा दिदीबहिनी नहुने दाजुभाइ र दाजुभाइ नहुने दिदीबहिनीको भीड लाग्थ्यो । पछिल्लो समय पहिले जति नआए पनि यहाँ भाइटीकाका दिन भक्तजनको लाम लाग्ने गर्छ ।
विसं २०३५ पछि नियमित रूपमा रानीपोखरीभित्रको बालगोपालेश्वर मन्दिर खुल्न थालेको हो ।
