काठमाडौं। आम जनता पार्टी (आजपा) ले अहिले बाढी, पहिरो, बर्षाले मुलुक संकटको सामना गरिरहेको बेला आवश्यक उद्धार, राहत, सहयोग एवं सहजीकरणका लागि पार्टी नेताकार्यकर्तालाई निर्देशन दिएको छ ।
आजपा प्रवक्ता चन्द्रभुषण साहले आज एक विज्ञप्ती जारी गर्दै अहिलेको संकटमा आवश्यक उद्धार, राहत, सहयोग एवं सहजीकरणमा जुटन पार्टीका नेताकार्यकर्तालाई अनुरोध गरेका छन ।
साथै पार्टी अध्यक्ष प्रभु साहको अध्यक्षतामा आयोजना हुने दशैं, दिपावली, छ्ठ पर्वका पुर्व निर्धारित सम्पुर्ण कार्यक्रम स्थगित गरिएको उनले जनाएका छन ।
`यस संकटको घडीमा आपसी सद्भाव, एकता, सहयोग र मानवीय संवेदनाका साथ यस विपद्को सामना गर्न प्रभावित क्षेत्रहरूमा युद्ध स्तरमा आवश्यक उद्धार, राहत, सहयोग एवं सहजीकरणका लागि हाम्रो सिङ्गो पार्टी पंक्ति सहित सम्पूर्ण सरोकारवाला निकायहरुलाई परिचालित रहन विशेष आह्वान समेत गर्दछौं,´ आजपा प्रवक्ता साहले जारी गरेको विज्ञप्तीमा उल्लेख गरिएको छ ।
देशभर जारी भिषण वर्षा, बाढी, डुबान र पहिरोका कारण विभिन्न स्थानहरूमा संचार तथा यातायात सेवा अवरोध र आम जनजीवन समेत अस्तव्यस्त भई ठुलो मात्रामा जनधनको क्षति हुनसक्ने सम्भावनप्रति आजपा गम्भीर चिन्तित रहेको बताईएको छ ।
`हाम्रो आम जनता पार्टी (आजपा) का विभिन्न कमिटीहरूद्वारा महान पर्व दशैं, दिपावली तथा छठको पावन अवसरमा राष्ट्रिय अध्यक्ष मा. प्रभु साहको प्रमुख आतिथ्यतामा आयोजना गर्न लागिएका प्रशिक्षण, भेटघाट तथा शुभकामना आदानप्रदान लगायतका सबै कार्यक्रमहरू आकष्मिक रूपमा नागरिकको सुरक्षा, राहत र सहयोग कार्यलाई प्राथमिकतामा राखेर तत्कालका लागि स्थगन गरिएको विषय जानकारी गराइन्छ,´ विज्ञप्तीमा उल्लेख गरिएको छ ।
आजपाले सर्वसाधारण नागरिकहरूलाई जलजन्य रोगहरू फैलिन नदिनका लागि सफा खानेपानी, सरसफाइ र स्वास्थ्य सर्तकतामा विशेष ध्यान दिई उच्च सतर्कता अपनाउन, जोखिमयुक्त क्षेत्रमा नजान, आवश्यक परे नजिकको सुरक्षाकर्मी वा स्थानीय प्रशासनसँग तत्काल सम्पर्क एवं समन्वय गर्न समेत अनुरोध गरेको छ ।
