काठमाडौं । चितवनको इच्छाकामना गाउँपालिकाको तुइन खोला छेउमा हिजो साँझदेखि झरेको पहिरो अझै रोकिएको छैन । ठूलो पहिरो खसेपछि मुग्लिन–नारायणगढ सडकखण्डमा दुईतर्फी आवागमन अवरुद्ध भएको छ ।
मुग्लिन–नारायणघाट सडक खण्ड को मुग्लिन नजिकै तुइन खोला छेउमा हिजो साँझदेखि पहिरो भरेको हो । पहिरो रातभरि पनि झर्ने क्रम नरोकिएकाले सवारी आवागमन दुवैतर्फ ठप्प भएको छ ।
दिउँसो देखिनै लगातार हल्का वर्षा भएको त्यस क्षेत्रमा साँझ भीर नै सडकमा खसेको इलाका प्रहरी कार्यालय मुग्लिनले जनाएको छ ।
पहिरो झर्ने क्रम अझै पनि जारी छ । तथापी हाल २ वटा लोडर परिचालनको लागि तयारी अवस्थामा राखिएको छ भने एउटा एक्साभेटर पनि साइटतर्फ जाँदै गरेको सडक डिभिजन भरतपुरले जनाएको छ ।
राजमार्गमा प्रहरीले माइकिङ गरेर यथास्थानमा सुरक्षित बस्न सवारी चालक र यात्रुहरूलाई आग्रह गरेको थियो ।
काठमाडौं र पोखराबाट चितवनतर्फ जाने सवारी साधन रोकिँदा तुइनखोलाभन्दा केही वरदेखि मुग्लिन बजारसम्मै सवारी साधनको जाम लागेको छ ।
जिल्ला प्रहरी कार्यालय चितवनले नारायणगढतिरबाट मुग्लिनतिर आउन लागेका र काठमाडौं तथा पोखरातिरबाट नारायणगढतर्फ जान लागेका सवारी साधनलाई सुरक्षित स्थानमा रोकिन आग्रह गरेको छ ।
सूरक्षालाई मध्यनजर गरि पहिरो झर्न रोकिएपछि क्रमश: यथाशक्य छिटोभन्दा छिटो आवागमन सूचारू गरिने सडक डिभिजन कार्यालयले जनाएको छ ।
सडक खुलाउन कति समय लाग्छ भन्ने यकिन नभएकाले वैकल्पिक सडकको प्रयोग गर्न समेत सडक डिभिजन कार्यालय भरतपुले जनाएको छ ।
