काठमाडौं । पूर्वअर्थमन्त्री तथा नेकपा (माओवादी केन्द्र) का उपमहासचिव जनार्दन शर्माले जेन–जी पुस्ताले सुरु गरेको आन्दोलनमाथि सरकारले गरेको दमनको घोर निन्दा गरेका छन् ।
सामाजिक सञ्जालमार्फत उनले आन्दोलनका क्रममा गोली लागेर ज्यान गुमाउनेप्रति श्रद्धाञ्जली अर्पण गर्दै घाइतेहरूको शीघ्र स्वास्थ्यलाभको कामना गरेका छन् । उनले घाइतेहरूको तत्काल उपचारको व्यवस्था गर्न सरकारसँग दृढ माग पनि गरेका छन् ।
शर्माले जेन–जी पुस्ताको आन्दोलनलाई दमनमार्फत होइन, गम्भीरतापूर्वक सम्बोधन गरी समाधान खोज्न सरकारलाई आग्रह गरेका छन् । ढिलाइ आत्मघाती हुने चेतावनी दिँदै उनले सामाजिक सञ्जालमाथि लगाइएको प्रतिबन्ध तत्काल फुकुवा गर्न र भ्रष्टाचारविरुद्ध कठोर कदम चाल्न माग गरेका छन् ।
उनले २०४६ सालयताका सम्पूर्ण सरकारी पदाधिकारीहरूको सम्पत्ति छानबिन गर्न स्वतन्त्र र शक्तिशाली आयोग गठन गर्नुपर्नेमा जोड दिएका छन् । “आन्दोलनलाई दमन गरेर रोक्न सकिँदैन भन्ने कुरा इतिहासले पटक–पटक पुष्टि गरिसकेको छ,” शर्माले फेसबुकमा लेखेका छन् ।
राजनीतिक दल र सरकारलाई आफ्ना कमजोरी स्वीकार गरी जनतासँग माफी माग्नुपर्ने बेला आएको उनको भनाइ छ । साथै उनले आन्दोलनमा सहभागी युवालाई संयमित र शान्तिपूर्ण ढंगले आफ्नो आन्दोलन अगाडि बढाउन हार्दिक अपिल गरेका छन् ।
