काठमाडौँ । उपप्रधानमन्त्री एवं अर्थमन्त्री विष्णुप्रसाद पौडेलले सरकार अहिले पूर्वाधार विकासमा वित्त व्यवस्थापनको चापमा रहेको बताउनुभएको छ ।
प्रतिनिधि सभाबाट सन्देशसहित प्राप्त वैकल्पिक विकास वित्त परिचालन विधेयक, २०८१ बारे सोमवार राष्ट्रिय सभामा सांसदहरुले उठाउनुभएका प्रश्नको जवाफ दिँदै उहाँले यस्तो बताउनुभएको हो । उहाँले ट्रेजरीमाथि भर गरेर पूर्वाधार निर्माणका क्षेत्रमा आजका आवश्यकताहरु सम्बोधन गर्न कठिन हुने अवस्था रहेको बताउनु भयो । उहाँले बजेट निर्माण गर्दैगर्दा जनप्रतिनिधिले समग्र देशका विकासका आयोजना जोडदार ढंगले उठाउने गर्नुभएको भन्दै माग सम्बोधन गर्ने चाहना हुँदा हुँदै पनि साधन र श्रोतको सिमितताका कारण पूरा हुन नसकेको बताउनु भयो । विधेयक पारित भएसँगै पूर्वाधारको क्षेत्रमा नयाँ ढोका खुल्ने जिकिर गर्नुभयो ।
उहाँले भन्नुभयो, ‘हामी यतिबेला पूर्वाधार विकासमा वित्त व्यवस्थापनको चापमा छौँ । हामीसँग ट्रेजरीमाथि भर गरेर पूर्वाधार निर्माणका क्षेत्रमा आजका आवश्यकताहरु सम्बोधन गर्न कठिन हुने अवस्था छ । बजेट निर्माण गर्दैगर्दा जनप्रतिनिधिले समग्र देशका विकासका आयोजना जोडदार ढंगले उठाउने गर्नुहुन्छ, ति जायज मागहरु राम्रोसँग सम्बोधन गर्न पाए हुन्थ्यो भन्ने लाग्छ तर त्यस हिसावले जान श्रोतको सीमाले दिँदैन । आवश्यक ठानिएका योजना पनि सम्बोधन गर्न सकिँदैन ।’
उपप्रधानमन्त्री पौडेलले स्वदेश र विदेशको पुँजी परिचालन गर्ने र पूर्वाधार क्षेत्रमा लगानी गर्ने काममा सरकार लागेको बताउनु भयो ।
