काठमाडौँ । उद्योग, वाणिज्य तथा आपूर्तिमन्त्री दामोदर भण्डारीले नेपालमा जलविद्युतको अपार सम्भावना रहेको बताउनुभएको छ ।
काठमाडौँको भृकुटीमण्डपमा शुक्रवार नेपाल पावर, लाइट एण्ड इलेक्ट्रिक, नेपाल कन्जुमर इलेक्ट्रोनिक्स एण्ड होम अपलायनसेस अन्तर्राष्ट्रिय प्रदर्शनीको शुभारम्भ गर्दै उहाँले यस्तो बताउनुभएको हो ।
उहाँले विद्युतको सम्भावनासँगै विद्युतीय सामग्रीहरुको प्रयोग पनि त्यत्तिकै बढिरहेको बताउनु भयो । नेपालले विद्युत छिमेकी देशमा पनि बेच्न सक्ने र विद्युतीय सामग्रीको प्रयोग अझ बढाउन सक्ने बताउनु भयो । नेपाल आफ्नो उत्पादनलाई वृद्धि गर्न र गुणस्तरमा प्रतिष्पर्धा गर्न तयार रहेको बताउनु भयो । नेपालमा विद्युतको क्षेत्रमा लगानी बढाउन पनि विदेशी कम्पनीहरुलाई आह्वान गर्नुभयो ।
उहाँले भन्नुभयो, ‘इलेक्ट्रिक पावरको एग्जिबेसन भइरहेको छ । अहिलेको प्रविधि र सम्भावनामा यो केन्द्रित छ । नेपालमा जलविद्युतको अपार सम्भावना छ । उत्पादन पनि भइरहेको छ । हामीले छिमेकी मुलुकमा निर्यात गर्नसक्छौँ । त्यस प्रयोजनका लागि विभिन्न कम्पनीहरुले आफ्ना उत्पादनहरु प्रश्ततु गर्नुभएको छ । गुणस्तरमा प्रतिष्पर्धा भइरहेको छ । हाम्रो उत्पादनलाई वृद्धि गर्नेकुरा स्वभाविक रुपमा हुन्छ । यसको खपत हुन्छ, यसको बजार निश्चित छ, आजको इलेक्ट्रिसिटीको जति आवश्यकता छ यसले हाम्रो सम्भावनालाई बल पु¥याउँछ । आएका सबै स्वदेशी, विदेशी कम्पनीहरुलाई नेपालमा स्वगत गर्दछौँ । निजी क्षेत्रबाट भइरहेको यो प्रयासलाई सरकारले विभिन्न किसिमको सहयोग गरिरहेको छ । यो सम्भावनासँगै यसको राम्रो भविष्य छ भन्ने म ठान्छु ।’
मन्त्री भण्डारीले आजको बजारमा वस्तुहरुको उत्पादन र बजारीकरणको होडबाजी रहेको उल्लेख गर्दै आफ्नो उत्पादनको बजारीकरण गर्ने होडबाजी रहेको बताउनु भयो । उक्त प्रतिष्पर्धामा नेपालका कम्पनीहरु पनि रहेको जिकिर गर्नुभयो । सरकारको तर्फबाट लगानी सहजीकरण गर्न र नीतिमा पनि सहुलियत दिएर प्रोत्साहित गरिरहेको बताउनु भयो । शुक्रवारबाट शुरु भएको प्रदर्शनी आईतवारसम्म सञ्चालन हुनेछ ।
