जुम्ला। भारतको उत्तरकाशीको धराली क्षेत्रमा साउन २० गतेको बाढीमा हराएका जुम्ला तिला गाउँपालिका–३ का ४४ वर्षीय जनकबहादुर शाहीलाई मंगलबार परिवारले प्रतीकात्मक रूपमा अन्त्येष्टि गरेको छ।
शव नपाएपछि आफन्तले धरालीको माटो र कुश प्रयोग गरी शव बनाई दाहसंस्कार गरेका हुन्। पटक–पटक खोजी गर्दा पनि करिब ५० फिट बालुवामा पुरिएको कारण शव भेटिने सम्भावना टुटेको परिवारजनले बताए।
शाही धरालीमा एक वर्षदेखि होटल सञ्चालन गर्दै आएका थिए। उनको निधनले परिवारको सपना भत्किएको भन्दै आफन्तले दुःख व्यक्त गरेका छन्। उनीहरूले नेपाल सरकारप्रति बेवास्ताको आरोपसमेत लगाएका छन्।
यसै बाढीमा घाइते भएका वीरेन्द्रबहादुर शाही र यज्ञ विक्रम शाहीको उपचार भने भारतमै भइरहेको छ।
