काठमाडौँ । पूर्वप्रधानमन्त्री एवं नेपाल समाजवादी पार्टी (नयाँ शक्ति)का अध्यक्ष डा. बाबुराम भट्टराईले आन्दोलनरत उखु किसानहरुको आन्दोलनलाई समर्थन जनाउनुभएको छ ।

मंगलवार काठमाडौंको माइतीघर मण्डलामा पुगेर उहाँले उखु किसानका मागहरु जायज रहेको भन्दै समर्थन जनाउनुभएको हो । उहाँले उखु किसानलाई दिने भनिएको अनुदान सरकारले एक्लौटी निर्णयबाट कटौती गरेको भन्दै सरकारको आलोचना गर्नुभयो । उहाँले उखु किसानलाई दिने भनिएको अनुदान घटाएको तथा घटाएको अनुदान मूल्य समेत समयमै उपलब्ध नगराएर सरकारले किसानहरुमाथि अन्याय र ठगी गरेको आरोप लगाउनु भयो । उहाँले आन्दोलनरत किसानहरुलाई आफ्ना जायज मागहरुप्रति एकताबद्ध भएर अडिग रहन समेत आग्रह गर्नुभयो ।

उहाँले भन्नुभयो, ‘लामो समयको आन्दोलनपछि किसानहरुलाई प्रतिक्विन्टलमा ७० रुपैयाँका दरले किसानहरुलाई अनुदान दिने कुरा भएको थियो । त्यो पनि किसानहरुको ठूलो आन्दोलनको कारणले हो । त्यो घटाएर ३५ रुपैयाँ पु¥याउने अनि त्यो पनि समयमा नदिने अरे । अनि सरकारले एक्लौटी गर्न मिल्छ ? यो त किसानहरुमाथि बद्मासी र ठगी भएन ? त्यसकारण किसानहरुको यो अभियान जायज छ । तर यसरी तपाईहरु मेहेनत गर्ने किसानहरु यहाँ आएर संघर्ष गर्नु दुःखद् छ । सबै घरपरिवार र वस्तु भएपनि हेर्नुपर्ने हुन्छ । जनतासँग जोडिराख्नुपर्छ । नत्र बिर्सिन्छन् भनेर यहाँ आएको हो । नत्र बालुवाटार गएर प्रधानमन्त्रीलाई भेट्थे नि । तपाईहरु दरोसँग उभिन आग्रह गर्दछु । किसान एकता महत्वपूर्ण कुरा हो ।’

मधेस प्रदेशसहित देशभरका उखु किसानहरुले सरकारले तोकेको प्रतिक्विन्टल ७० रुपैयाँ अनुदान कायम गर्न तथा वक्यौता रकम भुक्तानी गर्न माग गर्दै आन्दोलन गर्दै आएका छन् । आर्थिक वर्ष २०८१÷८२ को उखुको भुक्तानी रकम माग गर्दै उनीहरु आन्दोलनमा उत्रिएका हुन् ।