गोरखा। जातीय विभेद गरेको आरोपमा एक युवकलाई प्रहरीले पक्राउ गरेको छ ।
धादिङको गजुरी गाउँपालिका–२, मलेखु घर भएका २२ वर्षीय मिलन श्रेष्ठलाई पक्राउ गरिएको जिल्ला प्रहरी कार्यालयका प्रहरी नायब उपरीक्षक इन्द्रप्रसाद सुवेदीले जानकारी दिनुभयो ।
श्रेष्ठले गोरखाको सहिदलखन गाउँपालिका–१, बक्राङ माइती भएकी मनिका परियारसँग विवाह गरेका थिए । गर्भवती भएपछि उनले पत्नी दलित समुदायकी भएको भन्दै हेलाहोचो गर्नुका साथै विभेद गरेको आरोप छ । उनीबाट जन्मिएको छोराको जन्मदर्तासमेत नबनाएको पीडितले दिएको उजुरीमा उल्लेख छ ।
पीडित परियारले न्याय माग्दै जिल्ला प्रहरीमा जाहेरी दर्ता गरेकी थिइन् । सोही उजुरीका आधारमा प्रहरीले श्रेष्ठलाई पक्राउ गरेको डिएसपी सुवेदीले बताउनुभयो । उहाँका अनुसार श्रेष्ठलाई आइतबार धादिङ प्रहरीको समन्वयमा गजुरी गाउँपालिका– ६, राम्चेबाट पक्राउ गरिएको हो ।
पक्राउ परेका श्रेष्ठमाथि आज जिल्ला अदालत गोरखाबाट पाँच दिनको म्याद लिएर थप अनुसन्धान भइरहेको डिएसपी सुवेदीले बताउनुभयो ।रासस
