राष्ट्रिय स्वतन्त्र पार्टीका सांसद शिव नेपालीले लिपुलेक र कालापानी क्षेत्र छिमेकी देशहरुले प्रयोग गरिरहेको समाचारप्रति सरकारको ध्यानाकर्षण गराउनुभएको छ ।
प्रतिनिधि सभाको बिहीवारको बैठकमा बोल्दै उहाँले राष्ट्रिय स्वाभिमान र भूभाग संरक्षणका लागि आवश्यक पहल चाल्न सरकारको ध्यानाकर्षण गराउनुभएको हो ।
सरकारले संविधानको संरक्षण गर्नुको सट्टा अपमान गरिरहेको उहाँको आरोप छ । उहाँले जनताको जीवनस्तर सुधार्ने, भ्रष्टाचार नियन्त्रण र मानव तस्करी रोक्नुपर्ने अवस्थामा सरकारले उल्टै ती विषयलाई हल्का खेलको रूपमा लिएको टिप्पणी गर्नुभयो । उहाँले मानव तस्करीजस्तो गम्भीर विषयमा ठूला दलहरू मौन रहने गरेको आरोप लगाउँदै उनले भ्रष्टाचारका घटनालाई पनि सरकारले बेवास्ता गरेको जिकिर गर्नुभयो । सांसद नेपालीले सरकारले वैकल्पिक शक्तिहरुमाथि निरन्तर कमजोर बनाउने प्रयास गरिरहेको आरोप समेत लगाउनु भयो । सांसद नेपालीले उपसभामुखमाथि अंकगणितीय खेल खेल्न लागिएको भन्दै त्यसलाई लोकतन्त्रको अपमानका रूपमा चित्रण गर्नुभयो ।
उहाँले भन्नुभयो, ‘लिपुलेक र कालापानीको भूभाग छिमेकी देशहरुले प्रयोग गर्ने भनेर आम सञ्चारमाध्यममा आएको छ । नेपालको भूभागको संरक्षण गर्न नेपाल सरकारले यथाशिघ्र पहल गर्छ भन्ने हामीले विश्वास गरेका छौं । सभामुख महोदय देश हाँक्नेहरुले संविधानको रक्षा गर्नुपर्ने हो । तर सरकारले त्यसको अपमान गरेको छ । जनताको जीवनस्तर सुधार्ने, भ्रष्टाचार नियन्त्रण गर्ने तथा मानव तस्करी नियन्त्रण गर्नुपर्ने सरकार आज तीनै खेलमा रमाइरहेको छ । मानव तस्करीजस्तो गम्भीर विषय उठ्दा ठूला दल कि आत्तिन्छन् ? भ्रष्टाचारको भ सुन्न डराउँछन् । काण्ड भन्दा औँला हामी नयाँ तिर तेर्साउँछन् । संसारका कुनै पनि देशमा जब भ्रष्टाचार र अत्याचार चरम सीमामा पुग्दछ । तब नयाँ वैकल्पिक शक्तिहरुलाई जन्माउँछ । नयाँ वैकल्पिक शक्तिहरुलाई सिध्याउने खेलमा सरकारले रवि लामिछानेमाथि अन्याय ग¥यो । अब आदिवासि जनजातिकी छोरी उपसभामुखमाथि अंकगणितीय खेल खेल्दैछ । योभन्दा ठूलो लोकतन्त्रको अपमान के हुनसक्छ सभामुख महोदय ?’
उहाँले भिजिट भिसा प्रकरणको निष्पक्ष छानविन नगरेसम्म आफूहरुको आन्दोलन जारी रहने समेत बताउनु भयो ।
