काठमाडौं । अस्ट्रेलियामा जारी टप एन्ड टी-२० सिरिजमा नेपालले लगातार दोस्रो जित हात पारेको छ । बुधबार नेपालले मेलबर्न रेनेगेड्स एकेडेमीलाई ३३ रनले हराएको हो ।
नेपालले दिएको १४० रनको लक्ष्य पछ्याएको रेनेगेड्सले २० ओभरमा १०६ रन मात्र बनायो । रेनेगेड्सका अर्जुन नायरले सर्वाधिक २६ रन बनाउदा जे लेमिरले १८ तथा ह्यारी डिक्सनले १६ रन जोडे ।
नेपालका लागि सोमपाल कामीले ४ ओभरमा १७ रन दिएर ५ विकेट लिए । कुशल भुर्तेलले २ विकेट लिँदा रुपेश सिंह, दिपेन्द्रसिंह ऐरी र शाहब आलमले १/१ विकेट लिए ।
त्यसअघि टस जितेर पहिले ब्याटिङ गरेको नेपालले २० ओभरमा ९ विकेट गुमाएर १३९ रन बनाएको थियो । नेपालका लागि कुशल मल्लले सर्वाधिक २९ रन बनाए । दिपेन्द्रसिंह ऐरीले २७ रन बनाउदा लोकेश बमले २४, भीम सार्कीले १७ तथा आरिफ शेख र रुपेश सिंहले समान १२ रन बनाए ।
रेनेगेड्सका लागि फर्गस ओनिल, लचलान बाङ्स, क्यालम स्टो र माइकल आर्चरले २/२ विकेट लिए ।
नेपालले अब शुक्रबार पाकिस्तान शाहीन्ससँग खेल्नेछ ।
