काठमाडौं । भारतमा कोभिड–१९ महामारीको प्रकोप बड्दै गर्दा भारतमा भएका नेपालीहरुलाई भारतीय प्रहरीले रातारात नेपालतर्फ पठाउने गरेको भेटिएको छ ।
पूर्वी नेपालको सुनसरी जिल्लाको हरिनगरमा पर्ने भारतीय सिमाबर्ती बजार घुस्किका हसरत अन्सारीले भारतीय प्रहरीले नेपालीलाई नेपालतर्फ पठाउने गरेको बताएका छन् ।
गत सोमबार भारतको जोगबनी बाट भारतीय प्रहरीको सहयोगमा १५ नेपाली मोरंग आइपुगेका छन् । नेपाल र भारत बीच दुवै देशका नाकाहरु बन्द गर्ने दुवै तिर प्रवेश गर्न चाहने लाई आआफ्नै सिमा क्षेत्रमा क्वारेण्टिाइनमा राख्ने सहमति भए पनि भारतीय सिमा सुरक्षा बल (एसएसबी) ले भने नेपालीहरुलाई नेपालतर्फ धमाधम पठाइरहेको छ ।
सिमाबर्ती कोशी गाउँपालिकाका उपाध्यक्ष अनितादेबी यादवले पनि भारतीय सिमा सुरक्षा बलले नेपालीहरुलाई भारतमै क्वारेन्टाइनमा नराखेर नेपाल पठाएको बताईन ।
भारतीय प्रहरीले नेपालतर्फ पठाएका ४ जनालाई इलाममा नेपाल प्रहरीले पक्राउ गरि क्वारेन्टाइनमा राखेको छ । भारतमा भएका क्वारेन्टाइनमा बसेका नेपालीहरुले समेत भारतमा आफुहरुलाई अपमानित गरिएको, न्यूनतम आवश्यकता बाट पनि बन्चित गरिएको गुनासो समेत गरेकाछन् ।
यसैगरी जनआस्था साप्ताहिकले जनायअनुशार हालै बाकेको नरैनापुर इलाकामा २१ जना नेपाली भारतीय प्रहरीको सहयोगमा नेपाल आइपुगेका छन् । उनीहरुलाई सिमाबर्ती सुऐया नाका बाट भारतीय प्रहरीले नेपाल तर्फ पठाएको नरैनापुर गाउँ पालिकाका प्रमुख इस्तिहाक अहमत शाहले बताए ।
गाउँपालिकाले नेपाल प्रहरीलाई खबर गरेपछि उनीहरुलाई पक्राउगरि पुन भारत नेपाल दश गजा क्षेत्रमा क्वारेन्टाइनमा राखिएको छ । प्रदेश नम्बर पाँचका मुख्य मन्त्रि शंकर पोखरेलले समेत बुधबार भारतीय प्रहरीले नेपालीलाई नेपाल तर्फ पठाइरहेको पुस्टि गरेका छन् । भारतले विश्व स्वास्थ्य संगठनको मापदण्ड बिपरित नेपालीलाई नेपालतर्फ पठाउने गरेको उनले गुनासो गरेका छन् ।
