काठमाडौं । प्रधानमन्त्री केपी शर्मा ओलीले झन्डै दुई वर्षदेखि हमासको नियन्त्रणमा रहेका विपिन जोशीको सुरक्षालाई सरकारले प्राथमिकता दिँदै हरसम्भव पहल भइरहेको बताउनुभएको छ ।
सामाजिक सञ्जालमा आज बिहानै एक स्टाटस लेख्दै प्रधानमन्त्री ओलीले हमास समूहले बन्धक बनाएका जोशीको रिहाइको पहल गर्नु हाम्रो जिम्मेवारी भएको बताउनुभएको हो ।
उहाँले इजरायलस्थित नेपाली दूतावासको समन्वयमा विपिनकी आमा पद्मा र बहिनी पुष्पाले त्यहाँका राष्ट्रपतिसँग भेटेर रिहाइको पहल गर्न आग्रह गरेको सेत बताउनुभएको छ ।
यसअघि आफूले मध्यपूर्वको शान्तिका लागि पहल गरिरहेका टर्कीका राष्ट्रपति रेसेप तैयप एर्दोगानसँग गत चैत ७ गते र इजिप्टका राष्ट्रपति अब्देल फत्ताह सइद हुुसैन खालिलसँग गत फागुन २८ गते मैले यस विषयमा ध्यानाकर्षण गर्दै फोन संवाद गरेको समेत उहाँले स्मरण गर्नुभएको छ ।
सामाजिक सञ्जालमा प्रधानमन्त्री ओलीले लेख्नुभएको छ–
इजरायलमा हमास समूहले बन्धक बनाएका बिपिन जोशीको शीघ्र रिहाइको पहल गर्नु हाम्रो जिम्मेवारी हो। इजरायलस्थित हाम्रो दूतावासको समन्वयमा बिपिनकी आमा पद्मा र बहिनी पुष्पाले महामहिम राष्ट्रपति H.E. Mr. Isaac Herzog र संसद अध्यक्ष H.E. Mr. Amir Ohana सँग भेटेर बिपिनको रिहाइको लागि पहल गर्न आग्रह गर्नु भएको छ । यसअघि मध्यपूर्वको शान्तिका लागि पहल गरिरहेका टर्कीका राष्ट्रपति रेसेप तैयप एर्दोगानसँग गत चैत ७ गते र इजिप्टका राष्ट्रपति अब्देल फत्ताह सइद हुसैन खालिलसँग गत फागुन २८ गते मैले यस विषयमा ध्यानाकर्षण गर्दै फोन संवाद गरेको थिएँ। सरकार बिपिनको सुरक्षालाई प्राथमिकता दिँद हर सम्भव पहलमा जुटिरहेको छ।
बिपिनको सुरक्षित र शीघ्र रिहाइ सुनिश्चित गर्न परराष्ट्र मन्त्रालयले खाडी क्षेत्रका दूतावास मार्फत निरन्तर संवाद गरिरहेको छ।
इजरायलमा सहयोग गरिरहेका नेपाली र स्थानीय नागरिक, पत्रकार, सुरक्षाकर्मी र सामाजिक अभियन्ता सबैप्रति विशेष धन्यवाद। बिपिनका परिवारको साथमा सरकार छ।
