काठमाडौँ । प्रहरीले ठमेलबाट ११५ केजी बुद्धचित्तको दानासहित दुई जना चिनियाँ नागरिकलाई पक्राउ गरेको छ ।
पक्राउ पर्नेमा चीनको हेनान प्रदेश घर भएका ४६ वर्षीय लिउ जिङताओ र २३ वर्षीय लिउ स्याओस्वाई रहेका छन् । जिल्ला प्रहरी परिसर काठमाडौँबाट खटिएको टोलीले उनीहरूलाई काठमाडौँ महानगरपालिका–१७ ठमेलस्थित जेपी मोडमा रहेको चिनियाँ होटलबाट पक्राउ गरेको हो ।
प्रहरीले उनीहरूको साथबाट ११५ केजी बुद्धचित्तको दाना र १२ लाख ७० हजार नगद समेत बरामद गरेको छ ।
काठमाडौँमा पर्यटक भिसामा आएका उनीहरु बाबुछोरा रहेका प्रहरी स्रोतले जनाएको छ । उनीहरूले अवैध तरिकाले बुद्धचित्तको दाना सङ्कलन गर्ने गरेको पाईएको छ । उनीहरूमाथि थप अनुसन्धान भईरहेको छ ।
