काठमाडौँ । आफ्नो गुमेको लिम्पियाधुरा, लिपुलेक र कालापानी लगायतकाे जमिन समेटेर नेपालले सार्वजनिक गरेको नयाँ नक्सा अस्वीकार्य रहेको भारतले जनाएको छ ।
भारतीय विदेश मन्त्रालयले बुधबार साँझ विज्ञप्ति जारी गरेर यस्ताे प्रतिक्रिया दिएको हो । भारतले नेपालले जारी गरेको नक्सालाई एकतर्फी भन्दै त्यो नयाँ नक्सा अस्वीकार्य रहेको जानकारी गराएको हो ।
भारतीय विदेश मन्त्रालयले यस्तो कार्यलाई गैरकूटनीतिक रुपमा लिएको जनाएको छ । यस्ता कार्यले विवाद समाधान गर्ने कामका लागि पनि बाधक हुने सो विज्ञप्तिमा जनाइएको छ ।
विदेश मन्त्रालयका प्रवक्ता अनुराग श्रीवास्तवले जारी गरेकाे उक्त विज्ञप्तिमा नेपालले एकतर्फी रुपमा जारी गरेको सो नक्सामा कुनै ऐतिहासिक आधार नरहेको भन्दै यसरी एकतर्फी रुपमा गरेका कार्यले दुई देशका कतिपय सीमासम्बन्धी समस्याहरु कूटनीतिक माध्यमबाट समाधान गर्ने कामका लागि पनि बाधा सिर्जना गर्ने उल्लेख छ ।
यस्तो कार्य बन्द गर्न, भारतीय सार्वभौमिकताको सम्मान गर्न भन्दै सो विज्ञप्तिमा आगामी दिनमा पनि सबै समस्याहरु कूटनीतिक माध्यमबाट समाधान गर्नेतर्फ सोच्न नेपालको नेतृत्वलाई भारतले आग्रह गरेको छ ।
भारतले यसअघि गत वर्ष उक्त इलाका समेटर भारतकाे नयाँ राजनैतिक नक्सा सार्वजनिक गरेकाे थियाे । साथै गत साता भारतीय रक्षामन्त्री राजनाथ सिंहले कालापानी क्षेत्रमा भारतीय सेनाले तयार पारेकाे सडककाे उदघाटन गरेका थिए ।
नेपालले भारतका उक्त दुबै कार्यकाे कडा शब्दमा निन्दा गर्दै उक्त क्षेत्रहरू नेपालकाे भएकाे एतिहासिक दस्ताबेजहरू नेपालसँग सुरक्षित रहेकाे जनाएकाे छ । नेपाली भूमिमा भारतीय फाैज बसेकाे भन्दै नेपालले उक्त क्षेत्रका बारेमा कुटनीतिक तहमा वार्ता गर्न र सीमा समस्याहरू सुल्झाउन तत्पर रहेपनि भारतले एकतर्फी रूपमा लिम्पियाधुरा, लिपुलेक र कालापानीमा फाैज तैनाथ गर्नुका साथै अरू सैन्य गतिविधि गरिरहेकाे छ ।
