मोरङ। कोशी प्रदेशका मुख्यमन्त्री हिक्मतकुमार कार्कीले नजिकै आउँदै गरेको चाडपर्वलाई ध्यानमा राखी कालोबजारी नियन्त्रण गर्न निर्देशन दिनुभएको छ ।
मुख्यमन्त्री तथा मन्त्रिपरिषद्को कार्यालय विराटनगरमा आज बसेको प्रदेश सुरक्षा समन्वय समितिको बैठकमा उहाँले नागरिकले सहज एवं सुपथ मूल्यमा आवश्यक सामान प्राप्त गर्नका लागि कालोबजारी रोकथाम र बजार अनुगमनलाई तीव्रता दिनुपर्ने बताउनुभयो ।
मुख्यमन्त्री कार्कीले प्रदेशको शान्तिसुरक्षाको अवस्था र विपद् व्यवस्थापनबारे जानकारी लिँदै आफ्नो क्षेत्रमा कटिबद्ध भएर लाग्न आग्रह गर्नुभयो ।
बैठकमा हाल देखिएका सुरक्षा चुनौती, गर्नुपर्ने काम र सीमा सुरक्षालगायत विषयमा छलफल भएको आन्तरिक मामिला तथा कानुन मन्त्रालयका उपसचिव कमलबहादुर थापाले जानकारी दिनुभयो । यस्तै, लागुपदार्थ बेचबिखन, ओसारपसार, रोकथाम, सडक सुशासन, सीमा क्षेत्रको तस्करी नियन्त्रणका लागि कार्ययोजना बनाएर काम गर्ने निर्णय गरिएको उहाँले बताउनुभयो ।
सुरक्षा समन्वय समितिको बैठकमा प्रदेशका सुरक्षा निकायका प्रमुखका साथै मोरङ, सुनसरी र झापाका प्रमुख जिल्ला अधिकारीको उपस्थिति रहेको थियो । रासस
