काठमाडाैंः भारतीय विदेश मन्त्रालयले नेपालमा सीमा सम्बन्धी विषयमा भइरहेका पछिल्ला घटनाक्रमका बारेमा नजिकबाट नियालीरहेको जनाएको छ ।
मन्त्रालयका प्रवक्ताले बिहीबार जारी गरेको विज्ञप्तिमा “हामीले यस विषयमा नेपालभित्र निकै सावधानीपूर्वक विचारविमर्श भएको ठानेका छौं” भन्दै यस मामिलाको गम्भीरतालाई नेपालले विशेष ध्यान दिएको विश्वास गरिएको उल्लेख छ ।
मन्त्रालयको विज्ञप्तिमा भनिएको छ, “भारत आफ्ना सबै छिमेकी मुलुकसँग विश्वास एवं आत्मविश्वासको वातावरणबीच आपसी संवेदनशीलता र आपसी सम्मानका आधारमा वचनवद्ध हुन खुला रहेको छ ।”
विज्ञप्तिमा अगाडि भनिएको छ, “यो निरन्तरको प्रक्रिया हो र यसका लागि रचनात्मक र सकारात्मक प्रयत्न जरुरी छ ।”
भारतले नेपालको समग्र विकास प्रयासमा निरन्तर सहयोग र समर्थन गरिआएको चर्चा गर्दै विज्ञप्तिमा पछिल्ला वर्षहरुमा दुई देशबीचको सम्बन्ध अझ उचाईमा पुगेका तथा द्विपक्षीय सहयोगमा विविधता ल्याइएको उल्लेख छ । भारतीय सहयोगमा नेपालमा ठूला र निकै महत्वपूर्ण परियोजनाहरु सम्पन्न भएको जनाइएको छ ।
कोविड–१९ को चुनौतीपूर्ण दिनहरुमा पनि भारतले नेपालसँग निर्वाध व्यापार र औषधि समेतका अत्यावश्यक वस्तुको आपूर्ति गरिरहेको भन्दै भारतले नेपालमा मेडिकल सामग्रीको आपूर्ति पनि गरेको विज्ञप्तिमा स्मरण गराइएको छ ।
नेपालले लिम्पियाधुरा, लिपुलेक र कालापानी क्षेत्रलाइ समेटेर नेपालकाे नयाँ राजनीतिक नक्सा सार्वजनिक गरेपछि भारतले दाेस्राे विज्ञप्ति प्रकाशन गरेकाे हाे । भारतले उक्त क्षेत्र भारतकाे रहेकाे भन्दै हालै एउटा सडक निर्माण गरी उद्घाटन गरेकाे छ ।
