काठमाडौँ । संस्कृति, पर्यटन तथा नागरिक उड्डयन मन्त्रालयले नारयणहिटी दरबार सङ्ग्रहालयको परिसरमा रेस्टुरेन्ट सञ्चालन गर्न दिएको विषयमा छानबिन गर्न समिति गठन गरेको छ । परिसरमा बतास समूहलाई रेस्टुरेन्ट सञ्चालन गर्न दिएको विषयमा मन्त्रालयले सहसचिव होप्रसाद लुईँटेलको संयोजकत्वमा पाँच सदस्यीय समिति गठन गरेको छ ।
समितिका सदस्यहरुमा सोही मन्त्रालयका उपसचिव टेकनारायण पौडेल, सूर्यमणि गौतम, पुरुषोत्तम खतिवडा र सदस्य सचिवमा शाखा अधिकृत टङ्कबहादुर नेगी रहनुभएको छ । मन्त्रालयले तीन दिनको समय दिई रायसुझावसहित प्रतिवेदन तयार गर्न समितिलाई निर्देशन दिएको हो ।
सरकारले नारायणहिटी दरबार परिसरमा जग्गा र व्यापारिक प्रयोजनका लागि प्रतिमहिना रु दुई लाख २१ हजार भाडा आउने गरी बतास समूहलाई दिएको बताइएको छ । सो समूहले सोही प्रयोजनका लागि संरचना बनाउन थालेपछि पर्यटनमन्त्री प्रेमबहादुर आलेले निर्माण कार्य रोक्न आदेश दिनुभएको थियो ।
