जोहानेसबर्गः भारत र दक्षिण अफ्रिकाबीचको दोस्रो टेस्ट क्रिकेट खेलमा दक्षिण अफ्रिका सात विकेटले विजयी भएको छ ।
भारतले प्रस्तुत गरेको २४० रनको लक्ष्य दक्षिण अफ्रिकाले तीन विकेट गुमाएर पुरा गरेको थियो ।
दक्षिण अफ्रिकालाई महत्वपूर्ण जित दिलाउन कप्तान डिन एल्गरले अविजित ९६ रन बनाएका थिए । अन्य खेलाडीमा भान डुसेनले पनि महत्वपूर्ण ४० रन बनाए । यस्तै एडन मार्करमले ३१, कीगन पिटरसनले २८ तथा टेम्बा बाभुमाले अविजित २३ रन बनाए ।
यसअघि टस जितेर पहिले ब्याटिङ गरेको भारतले पहिलो इनिङमा केएल राहुलको ५० रनको मद्दतले २०२ रन मात्र बनाएको थियो । अफ्रिकाका युवा खेलाडी मार्को जान्सेनले ४, कागिसो राबाडा र डुआन ओलिभिएरले ३–३ विकेट लिएका थिए ।
जोहानेसबर्गको बाउन्सी पिचमा दक्षिण अफ्रिकाले पनि खासै राम्रो स्कोर खडा गर्न सकेको थिएन । कीगन पिटरसनको ६२ तथा टेम्बा बाभुमाको ५१ रन मद्दतले अफ्रिकाले पहिलो इनिङमा २२९ रन मात्र बनाएर २७ रनको अग्रता लिएको थियो । भारतीय बलर शार्दुल ठाकुरले अफ्रिकाका सात विकेट लिएका थिए ।
भारतले दोस्रो इनिङमा केही सुधारिएको प्रदर्शन गर्न खोजे पनि धैर्य गुमाएको थियो । हनुमा बिहारी, चेतेश्वर पुजारा र अजिन्क्य रहाणेले केही समालिएको खेल प्रदर्शन गरे पनि पूरै टिम ६०.१ ओभरमा २६६ रनमै समेटिएको थियो ।
अफ्रिका समक्ष जितका लागि २४० रनको लक्ष्य प्रस्तुत गरे पनि अफ्रिकाले ३ विकेट गुमाएर ६७.४ ओभरमा २४३ रन बनायो ।
यो जितसँगै तीन टेस्टकाे शृंखला १–१ को बराबरी भएको छ । सेन्चुरिएनमा भएको पहिलो टेस्ट भारतले ११३ रनले जितको थियो । अब तेस्रो तथा अन्तिम टेस्ट केप टाउनमा जनवरी ११ मा हुनेछ ।
