कैलाली । राष्ट्रिय प्रजातन्त्र पार्टीका अध्यक्ष राजेन्द्र लिङ्देनले कसैलाई राजा बनाउन र कुनै जात विशेषले मानेको धर्मलाई प्रवद्र्धन गर्न मात्र राजसंस्था र हिन्दूराष्ट्रको कुरा नगरेको बताउनुभएको छ ।
राष्ट्रिय प्रजातन्त्र पार्टीको बिहीबार धनगढीमा आयोजित सुदूरपश्चिम प्रदेश स्तरीय सभामा उहाँले हिन्दूराष्ट्र कुनै जात विशेषले मान्ने धर्मको कुरा मात्र नभई नेपाली जनताको एकता र पहिचानसँग सम्बन्धित विषय रहेको बताउनुभयो । उहाँले भन्नुभयो, “यो विषय नेपालको गौरवसँग सम्वन्धित विषय हो र हामी सबै नेपालीलाई जोड्ने चीज हो ।”
अध्यक्ष लिङदेनले केही पार्टी र राजनीतिक दलहरुले पैसा कमाउने सबभन्दा सजिलो बाटोका रुपमा राजनीतिलाई विकसित गरेको आरोप लगाउनुभयो । उहाँले राष्ट्रिय प्रजातन्त्र पार्टी लोकतन्त्र र जनताको सर्वोच्चता प्रति पूर्णरुपले प्रतिबद्ध रहेको उल्लेख गर्नुभयो ।
