काठमाडौँ । सभामुख देवराज घिमिरेले गीतसंगीत नागरिकको मन, मुटु छुने क्षेत्र भएको बताउनुभएको छ ।
आईतवार छिन्नलता गीत पुरस्कार गुठीले आयोजना गरेको कार्यक्रममा बोल्दै उहाँले यस्तो बताउनुभएको हो । उहाँले बोलेका कुराहरु त्यति प्रभावकारी नहुने तर त्यसैलाई गीत, संगीतको माध्यमबाट प्रश्तुत गर्दा प्रभावकारी बन्ने बताउनु भयो । उहाँले गीत संगीत स्मरणमा रही रहने क्षेत्र भएको बताउनु भयो । हरेक कुरालाई जनसमुदायमा प्रभावकारी ढंगबाट लैजाने माध्यम नै गीत, संगीत भएको बताउनु भयो ।
सभामुख घिमिरेले भन्नुभयो, ‘हामीले बोलेका र गरेका कुराहरु प्रभावकारी हुँदैनन् । तर तिनै कुराहरुलाई संगीतको माध्यमबाट, गीतको माध्यमबाट लैजाँदा स्मरणमा रही रहन्छन् र प्रभावकारी ढंगबाट मन मष्तिष्कलाई छुन सक्छ । मुटुलाई र दिमागलाई छुन सक्छ । जनसमुदायमा प्रभावकारी ढंगबाट लैजाने विधाहरुमध्ये सबैभन्दा ठूलो संगीत र गीतको विधा हो । त्यसपछि कविता लगायत अन्य कुराहरु हो ।’
सभामुख घिमिरेले वरिष्ठ गीतकार श्रीमती रमोलादेवी शाह ‘छिन्नलता’ को १०३ औं जन्मजयन्तीको अवसरमा ४३ औं छिन्नलता गीत पुरस्कार समर्पण समेत गर्नुभयो । छिन्नलता गीत पुरस्कारबाट यस वर्ष गीत रचना राजेन्द्र रिजाल, संगीत सिर्जना अच्युतप्रसाद फुयाल, संयुक्त गायनबाट रामभक्त जोजिजू र इतु जोजिजू, युवा प्रतिभा पुरस्कारबाट एसडि योगीलाई सम्मान गर्नुभयो ।
