काठमाडौँ । पत्रकार दिलभूषण पाठकको मुद्दा जिल्ला अदालत काठमाडौँका न्यायाधीश खेमराज भट्टको इजलासमा तोकिएको छ । विद्युतीय (इलेकट्रोनिक) कारोबार ऐन अन्तर्गतको कसुरमा उनको बयान र थुनछेक आज बहस हुने भएको हो ।
यससँगै, पाठक आज आफैँ अदालतमा उपस्थित भएका छन् । उनी उपस्थित भएपछि बयान र थुनछेकका लागि न्यायाधीश भट्टको ३१ नम्बर इजलासमा पेसी तोकिएको सूचना अधिकार दीपककुमार श्रेष्ठले बताए ।
गत सोमबार साइबर ब्युरोको अनुसन्धान प्रतिवेदनका आधारमा जिल्ला सरकारी वकिलको कार्यालय काठमाडौँले उनीविरुद्ध मुद्दा दायर गरेको थियो । ब्युरोले विद्युतीय कारोबार ऐन २०६३ अन्तर्गतको कसुरमा एक लाख जरिवाना वा पाँच वर्ष कैद वा दुवै सजायको मागदाबी गरेको छ ।
