काठमाडौंः नेकपा (माओवादी) का अध्यक्ष पुष्पकमल दाहाल प्रचण्ड र वरिष्ट नेता नारायणकाजी श्रेष्ठ दुबैलाई कोरोनाभाइरस (कोभिड) संक्रमण भएको छ ।
अध्यक्ष प्रचण्डकाे सचिवालय र नेता श्रेष्ठले आज बेग्लाबेग्लै ट्वीट गर्दै आफूहरु कोभिड संक्रमित भएको र स्वास्थ्यलाभ गरिरहेको बताउनु भएको छ ।
अध्यक्ष प्रचण्डको सचिवालयले गरेको ट्वीटमा भनिएको छ, अध्यक्ष प्रचण्डको स्वास्थ्यमा केही असहजता देखिएकोले हिजो बेलुकी पिसिआर परीक्षण गर्दा कोरोना पोजेटिभ देखिएको छ। उहाँ अहिले आफ्नै निवासमा स्वास्थ्यलाभ गरिरहनु भएको र स्वास्थ्य अवस्था सामान्य छ।
सचिवालयले यो बीचमा अध्यक्ष प्रचण्डको सम्पर्कमा रहनु भएका सबैले सतर्कता अपनाउनु अनुरोध गर्दै डाक्टरको सल्लाह अनुसार आइसोलेशनमा बस्नुपर्ने भएकोले पूर्वनिर्धारित सम्पुर्ण कार्यक्रमहरु स्थगित गरिएको जानकारी गराएको छ ।
त्यस्तै नारायणकाजी श्रेष्ठले पनि सामाजिक संजाल ट्वीटर र फेसबुकमा स्टाटस लेख्दै पिसिआर परीक्षणमा कोरोना संक्रमण देखिएकोले आफू होम आइसोलेसनमा रहेको कम्तिमा १४ दिन आइसोलेसनमा नै रहने बताउनु भएको छ । उहाँले हालसालै आफूसंग प्रत्यक्ष सम्पर्कमा रहनुभएका सबैलाई आवश्यक सावधानी अपनाउन अनुरोध गर्नु भएको छ ।
नेकपा माओवादी केन्द्रको महाधिवेशन लगत्तै माओवादी केन्द्रको सचिवालयका धेरै सदस्यमा कोरोनाभाइरस संक्रमण देखिएको भन्दै अध्यक्ष प्रचण्ड लगायतका सबै पदाधिकारीको भेटघाट र बधाई साटासाट गर्ने कार्यक्रम स्थगित गरिएको थियो ।
