काठमाडौँ । राष्ट्रिय प्रजातन्त्र पार्टीका वरिष्ठ उपाध्यक्ष रविन्द्र मिश्रले निर्दोषहरूले न्याय पाउने नैसर्गिक अधिकारमा राजनीतिको छायाँ पर्न नहुने बताएका छन् ।
मंगलबार काठमाडौँ जिल्ला अदालतबाट ३ लाख धरौटीमा रिहा भएका मिश्रले सामाजिक सञ्जालमार्फत यस्तो प्रतिक्रिया दिएका हुन् ।
‘म न्यायलयप्रति आभारी छु । निर्दोषहरूले न्याय पाउने नैसर्गिक अधिकारमा राजनीतिको छाया कहिल्यै नपरोस् । न्यायलय सदा स्वतन्त्र रहोस् – यही कामना गर्दछु ।’ उनले भनेका छन् ।
५० दिनको हिरासत बसाइ र त्यसपछि एक महिनाको असहज स्थितिपछि अहिले सामान्य अवस्थामा फर्किएको जनाउँदै उनले ५० दिनको हिरासत बसाइमा ३५ वटाभन्दा बढी कविता लेखेको पनि बताए ।
कम्तिमा ३० वर्षपछिको नेपाललाई मनन गरेर देशको दिर्घकालीन हित र समग्र रूपान्तरणप्रतिको आफ्नो अटल विश्वास र दृढतामा कुनै कमी नआएको भन्दै मिश्रले अबको कानुनी संघर्षमा पनि न्यायलयबाट न्याय पाउनेमा विश्वस्त रहेको जनाएका छन् ।
उनले सामाजिक सञ्जालमा लेखेका छन् –
८२ दिनपछिको पोस्ट:
१. राज्य (राजनीतिक नेतृत्व) ले प्रतिशोध साँध्न भरमग्दुर प्रयास गर्दागर्दै पनि अस्ति जिल्ला अदालत, काठमाडौँले मलाई न्याय दिएको छ, यद्दपी लामो कानूनी प्रकृया बाँकी नै छ। केही समयअघि बन्दी प्रत्यक्षीकरणको रिटमा सर्वोच्च अदालतले त्यसैगरी न्याय दिएको थियो। म न्यायलयप्रति आभारी छु। निर्दोषहरूले न्याय पाउने नैसर्गिक अधिकारमा राजनीतिको छाया कहिल्यै नपरोस्। न्यायलय सदा स्वतन्त्र रहोस् – यही कामना गर्दछु।
२. ५० दिनको हिरासत बसाइ र त्यसपछि एक महिनाको असहज स्थितिपछि म अहिले सामान्य अवस्थामा फर्किएको छु। यी कठिन दिनहरूमा मलाई निस्वार्थ ढङ्गबाट आत्म विश्वास दिने, साथ र समर्थन दिने देश-विदेशमा रहेका सम्पूर्ण नेपालीप्रति मैले जति आभार प्रकट गरे पनि पुग्दैन। सशक्त अधिवक्ताहरूको दरो र निस्वार्थ साथ नभइदिएको भए आजको स्थिति संभव हुने थिएन। सबैलाई नमन गर्दछु!
३. अब म सबैसँग सामान्य अवस्थामा जस्तै सम्पर्कमा रहने नै छु। ५० दिनको हिरासत बसाइमा ३५ वटाभन्दा बढी कविता लेखेको रहेछु। तीमध्यै कुनैकुनै सामाजिक सञ्जालमा प्रेषित गर्ने नै छु।
४. कम्तिमा ३० वर्षपछिको नेपाललाई मनन गरेर देशको दिर्घकालीन हित र समग्र रूपान्तरणप्रतिको मेरो अटल विश्वास र दृढतामा कुनै कमी आएको छैन।
५. भावी कानुनी संघर्षमा पनि न्यायलयबाट न्याय पाउनेछु भन्नेमा विश्वस्त छु। सबैप्रति पुन: एकपटक आभार प्रकट गर्दछु!
आजलाई यत्ति नै।
