एजेन्सी । अमेरिकी राष्ट्रपति डोनाल्ड ट्रम्पको प्रशासनले राष्ट्रिय सुरक्षा खतरालाई उद्धृत गर्दै थप ३६ देशका नागरिकहरूलाई अमेरिका प्रवेशमा प्रतिबन्ध लगाउने विचार गरिरहेको छ ।
यस महिनाको सुरुमा १२ देशका नागरिकहरूलाई देश प्रवेश गर्न प्रतिबन्ध लगाइएको छ ।
विदेश सचिव मार्को रुबियोद्वारा हस्ताक्षर गरिएको कूटनीतिक केबलमा विदेश विभागले संलग्न देशहरूको बारेमा चिन्ताहरू प्रकाश पारेको छ र सुधारात्मक कारबाहीको माग गरेको छ ।
राहदानीको सुरक्षामाथि पनि प्रश्न उठ्यो
विभागले चिन्ताजनक ३६ देशहरू पहिचान गरेको छ, जसका नागरिकहरूले ६० दिनभित्र स्थापित मापदण्ड र आवश्यकताहरू पूरा नगरेमा प्रवेशमा प्रतिबन्ध लगाउन वा स्वदेश फिर्ता पठाउन सिफारिस गरिने सम्भावना छ ।
यो केबल पहिलो पटक द वाशिंगटन पोस्टले रिपोर्ट गरेको थियो । केबलमा उठाइएका चिन्ताहरूमा केही देशहरूमा भरपर्दो पहिचान कागजातहरू सिर्जना गर्न सक्षम संस्थाको अभाव समावेश छ । राहदानीको सुरक्षाको बारेमा पनि प्रश्न उठाइएको छ ।
यदि आगामी ६० दिनभित्र यी समस्या समाधान भएन भने यी देशका नागरिकहरूलाई प्रतिबन्ध लगाउन सकिन्छ । जसअनुसार अंगोला, एन्टिगुआ र बारबुडा, बेनिन, भुटान, बुर्किना फासो, काबो भर्डे, कम्बोडिया, क्यामरुन, कोट डीुआइवर, प्रजातान्त्रिक गणतन्त्र कंगो, जिबूती, डोमिनिका, इथियोपिया, इजिप्ट, गाबोन, गाम्बिया, घाना, किर्गिस्तान, लाइबेरिया, मलावी, मौरिटानिया, नाइजर, नाइजेरिया, सेन्ट किट्स र नेभिस, सेन्ट लुसिया, साओ टोम र प्रिन्सिपे, सेनेगल, दक्षिण सुडान, सिरिया, तान्जानिया, टोंगा, तुभालु, युगान्डा, भानुआटु, जाम्बिया र जिम्बाब्वे समावेश छन् ।
