उत्तरपश्चिमी नाइजेरियाको जाम्फारा राज्यमा सशस्त्र डाकाहरूले गरेको आक्रमणमा करिब २०० व्यक्तिको मृत्यु भएको अनुमान गरिएको छ । गत साता तिनीहरूको लुक्ने ठाउँमा सेनाले हवाई आक्रमण गरेपछि डाकाहरुले आक्रमण गरेको स्थानीय बासिन्दाले बताएका छन् ।
राज्य सरकारले सामूहिक आक्रमणमा ५८ जनाको ज्यान गएको जनाएको छ । यद्यपि सामूहिक अन्त्येष्टि आयोजना गर्न शनिबार आफ्नो गाउँ फर्केका स्थानीयहरूले रोयटर्स समाचार एजेन्सीलाई मृतकको सङ्ख्या २०० नाघेको बताए।
सेनाले सोमबार गुसामी जङ्गल र जाम्फाराको पश्चिम त्साम्रे गाउँमा लक्षित हवाई हमला गरेको थियो र उनीहरूका दुई नेतासहित १०० भन्दा बढी डाकालाई मारेको थियो।
मोटरसाइकलमा आएका तीन सयभन्दा बढी बन्दुकधारीले मङ्गलबार जाम्फाराको आन्का स्थानीय इलाकाको आठ गाउँमा आक्रमण गरे थिए । उनीहरुले छिटपुट गोली चलाएका थिए जसमा कम्तीमा ३० जनाको मृत्यु भयो।
आक्रमणकारीहरूले बुधवारदेखि बिहीबारसम्म अन्का र बुक्क्युम जिल्लाका १० वटा गाउँमा भेला भएर त्यहाँका बासिन्दाहरूलाई गोली हानेर लुटपाट र घरमा आगजनी गरेका थिए।
कुर्फा दान्या गाउँका बाबन्दी हमिदुले आक्रमणकारीहरूले देखिएका जो कोहीलाई गोली हानेको बताए । हमिदुले एएफपी समाचार एजेन्सीलाई भने, “दश गाउँमा १४० भन्दा बढी मानिसलाई गाडिएको छ र धेरै व्यक्तिको पहिचान नभएकाले थप शवको खोजी कार्य जारी छ ।”
