काठमाडौं। सिनेमा क्षेत्रमा साढे दुई दशक बिताएकी अभिनेत्री रेखा थापा नाटक ‘मीरा’ मार्फत रंगमञ्चमा डेब्यू गर्दैछिन्। नाटक वैशाख १५ गते बिहीबारदेखि मञ्चन हुँदैछ।
उक्त दिन रेखा आबद्ध राप्रपाले राजधानीमा आन्दोलन गर्ने भएपछि फिल्म ‘महाभोज’को प्रदर्शन मिति सारिएको छ। आन्दोलनले जनजीवन प्रभावित पार्न सक्ने भन्दै फिल्म टिमले प्रदर्शन स्थगन गरेको हो।
‘महाभोज’ले प्रदर्शन रोक्दै गर्दा रेखा भने नाटक रिहर्सल गर्दैछिन् । आन्दोलन र फिल्म स्थगनबारे भन्छिन्, ‘हरेक मान्छेले आफ्नो व्यवसाय गर्न पाउनुपर्छ । आन्दोलन पनि व्यवसायी मजदुर वा देशका विभिन्न तह र तप्काका मनिसकै लागि गर्न खोजिएकै होला । आन्दोलनले कुनै व्यवसायलाई असर पार्नुहुँदैन ।’
कसैलाई असर पर्ने गरी आन्दोलन गर्नु नहुने उनको बुझाइ छ । भन्छिन्, ‘बाटो हिँड्ने बटुवालाई पनि असर गर्छ भने त्यो आन्दोलन, आन्दोलन होइन ।’ उनले नाटक तोकिएको मितिमै मञ्चन हुने स्पष्ट पारिन्, “नाटक किन नहुने? म त मितिमै मञ्चन गर्छु।”
