क्राइस्टचर्च (न्यूजील्यान्ड) : न्यूजील्यान्ड र बंगलादेशबीचको दोस्रो टेस्ट क्रिकेटमा न्यूजील्यान्डसामु बंगलादेश निरीह देखिएको छ ।
क्राइस्टचर्च मैदानमा भएको खेलमा बंगलादेशले पहिलो इनिङमा सबै विकेट गुमाएर १२६ रन मात्र बनाएको छ । न्यूजील्यान्डले पहिलो इनिङमा बनाएको ५२१ भन्दा ३९५ रनले पछि परेसँगै बंगलादेश फलोअनमा परेको छ ।
बंगलादेशका लागि यासिर अलिले ५५ र नुरुल हसनले ४१ रन बनाउनु बाहेक अरु खेलाडी सस्तैमा आउट भएका थिए । भ्रमणकारी बंगलादेशलाई ध्वस्त बनाउनेक्रममा न्यूजील्यान्डका तिब्र गतिका बलरहरु ट्रेन्ट बोल्टले ५, टिम साउदीले ३ र काइले जेमिसनले २ विकेट लिएका थिए । बंगलादेशको पूरै टिम ४१.२ ओभरमै पभेलियन फर्केको थियो ।
यसअघि टस हारेर ब्याटिङको निम्तो पाएको न्यूजील्यान्डले पहिलो इनिङमा धुँवाधार ब्याटिङ मद्दतले ५२१ रन बनाएर पारि समाप्तिको घोषणा गरेको थियो । टिमका लागि प्रारम्भिक ब्याट्सम्यान एवं कप्तान टम लथामले २५२ तथा डेभोन कन्वेले १०९ रनको उत्कृष्ट पारि खेलेका थिए ।
दुई टेस्टको यस शृंखलामा पहिलो खेल भने बंगलादेशले ८ विकेटले जितेको थियो । एपी
