काठमाडौंः राष्ट्रपति विद्यादेवी भण्डारीले सिंहदरबार अघिको पृथ्वीनारायण शाहको शालिकमा माल्यार्पण गर्ने हुनु भएको छ ।
राष्ट्रपतिको कार्यालय स्रोतका अनुसार राष्ट्रपति भण्डारीले भोलि मंगलबार बिहान करिब ११ बजे सिंहदरबार अघिको पृथ्वीनारायण शाहको शालिकमा माल्यार्पण गर्नु हुनेछ । राष्ट्रपति भण्डारीले यसअघि दुई वर्ष अघि पनि पृथ्वीनारायणको शालिकमा माल्यार्पण गरी राष्ट्र निर्माताप्रति सम्मान व्यक्त गर्नु भएको थियो ।
राष्ट्रपति भण्डारीले भोलि नै दहचोकस्थित कालु पाण्डेको शालिकमा पनि माल्यार्पण एवं सम्मान गर्ने कार्यक्रम छ । कालु पाण्डे पृथ्वीनारायण शाहका सेना प्रमुख हुनुहुन्थ्यो । नेपाल एकीकरणमा पाण्डेको अतुलनीय योगदान रहेको छ ।
नेपाल सरकारले पृथ्वीजयन्ती तथा राष्ट्रिय एकता दिवसका अवसरमा सार्वजनिक विदा दिने वा नदिने भन्नेमा अन्यौल भइरहेको अवस्थामा राष्ट्रपतिबाट पृथ्वीनारायण शाहप्रति उच्च सम्मान व्यक्त गर्नुलाई धेरैले सकारात्मक रुपमा लिएका छन् ।
यस वर्ष ३०० औं पृथ्वी जयन्ती तथा राष्ट्रिय एकता दिवस पनि हो ।
पृथ्वीनारायण शाहको शालिकमा माल्यार्पण गर्न नेपाली सेना सहित विभिन्न सामाजिक संघसंस्थाले भोलि बाजागाजा सहित सांस्कृतिक झाँकी प्रस्तुत गर्ने तयारी गरेका छन् । कतिपय दलले यस दिनलाई राष्ट्रिय एकता दिवसका रुपमा पनि मनाउने गरेका छन् ।
यसै अवसरमा पूर्व राजा ज्ञानेन्द्र शाह समेत पृथ्वीनारायण शाहको शालिकमा माल्यार्पण गर्न भोलि करिब १२.३० बजे सिंहदरबार अघि आउनु हुनेछ । उहाँ पहिलो पटक सिंहदरबार अघि पृथ्वीको शालिकमा माल्यार्पणका लागि आउन लाग्नु भएको हो ।
रविन्द्र मिश्रको अध्यक्षतामा रहेको विवेकशिल साझा पार्टीले पनि तीन बुँदे माग यसअघि नै राखेर राष्ट्रनिर्माताप्रति उच्च सम्मान गर्न आग्रह गरेको थियो । ती मागहरुमा राष्ट्रिय एकता दिवसलाई नेपाल दिवसका रुपमा मनाउनुपर्ने, राष्ट्रिय एकता दिवसका दिन सार्वजनिक विदा दिनुपर्ने तथा नेपाली रुपैयाँमा पृथ्वीनारायण शाहको तस्बिर अंकित गर्नुपर्ने रहेका छन् ।
अर्को दल राष्ट्रिय प्रजातन्त्र पार्टीले पनि पृथ्वीजयन्तीका दिन सार्वजनिक विदा दिन प्रधानमन्त्री शेर बहादुर देउवालाई ज्ञापनपत्र यसअघि नै बुझाइसकेको छ ।
देशका विभिन्न स्थानीय निकायहरुले पनि स्थानीय तहमा सार्वजनिक विदा दिएर पृथ्वीनारायण शाहप्रति सम्मान व्यक्त गरिरहेका छन् ।
तर नेपाल सरकारले पृथ्वीजयन्ती एवं राष्ट्रिय एकता दिवसलाई औपचारिक रुपमा मनाउने वा नमनाउने भन्नेमा स्पष्ट हुन सकेको छैन । सत्ता साझेदार दलहरु र प्रमुख प्रतिपक्षी दलका कैयौं नेता तथा कार्यकर्ताले पृथ्वीजयन्तीलाई राष्ट्रिय एकता दिवसका रुपमा मनाउन कुरा उठाइरहे पनि नेतृत्व तहले यसलाई स्वीकार गरिसकेको छैन ।
