काठमाडौं । फ्रेन्च क्लब पेरिस सेन्ट जर्मेन(पिएसजी) च्याम्पियन्स लिगको फाइनलमा प्रवेश गरेको छ ।
भर्खरै सम्पन्न सेमिफाइनलको दोस्रो लेगमा ईंग्लिश क्लब आर्सनललाई २–१ गोलले हराउँदै समग्रमा ३–१ को नतिजासहित पिएसजीले फाइनलमा स्थान बनाएको हो । पिएसजी च्याम्पियन्स लिग इतिहासमै दोस्रोपटक फाइनलमा पुगेको हो ।
तेस्रो मिनेटमा आर्सनलका डेक्लान राइसले प्रहार गरेको बल थोरै बाहिर गयो । उनले हेडिङबाट प्रहार गरेको बल गोल हुनबाट अलिकति मात्रै पर थियो ।
चौथो मिनेटमा आर्सनलकै गाब्रीयल मार्टिनेलीको प्रहारलाई पिएसजीका गोलकिपर डोनारुम्माले उत्कृष्ट बचाउ गरे । आठौं मिनेटमा मार्टिन ओडेगार्डले डि-बक्स बाहिरबाट प्रहार गरेको बललाई पुनः डोनारुम्माले विफल पारे ।
१७ औं मिनेटमा पिएसजीका ख्भिचा कार्भस्केलियाले प्रहार गरेको बल आर्सनलको गोल पोस्टमा लागेर बाहिरियो । २२ औं मिनेटमा पिएसजीका डिजाइर डोएले प्रहार गरेको बल आर्सनलका गोलकिपर डेभिड रायाले सजिलै नियन्त्रणमा लिए ।
२७ औं मिनेटमा पिएसजीले अग्रता लियो ।फाबियन रुइजले उत्कृष्ट गोल गर्दै घरेलु टोलिलाई अग्रता दिलाए । आर्सनलका थोमस पार्टेले क्लियर गरेको बललाई रुइजले चेस्टले नियन्त्रणमा लिँदै सशक्त प्रहार गरेको बलले जाली चुम्यो ।
३० औं मिनेटमा पुनः पिएसजीले अग्रता दोब्बर पार्ने अवसर गुमायो । काउन्टरमा लगेको बलबाट पाएको मौकामा ब्राड्ली बार्कोलीको प्रहारलाई रायाले बचाउ गरे ।
६३ औं मिनेटमा आर्सनलका बुकायो साकाको प्रहारलाई डोनारुम्माले विफल पारे । देब्रे खुट्टाले प्रहार गरेको साकाको बललाई थोरै मात्रै भेटेका डोनारुम्माले पन्च गर्दै बाहिर पठाए ।
६६ औं मिनेटमा पिएसजीले पेनाल्टी पायो । लुइस स्केलीको ह्यान्ड बलमा भिएआरले पिएसजीलाई पेनाल्टी दिलायो । तर, आर्सनलका गोलकिपर डेभिड रायाले बचाउ गरे । पिएसजीका भिटिन्हा पेनाल्टीमा गोल गर्न चुके ।
७२ औं मिनेटमा पिएसजीले अग्रता दोब्बर पार्यो । अच्रफ हाकिमिले गोल गर्दै पिएसजीलाई अग्रता दिलाएका हुन् । ७६ औं मिनेटमा बुकायो साकाले गोल गर्दै आर्सनललाई १–२ को अवस्थामा ल्याए । ८० औं मिनेटमा आर्सनलले गोल गर्ने अवसर गुमायो ।
साकाले डि–बक्सभित्र पाएको सुनौलो मौका आकाशिन पुग्यो । खाली पोस्टमा साकाले सन्तुलन गुमाए । एग्रीगेटमा दुई गोलले पछि परेको आर्सनललाई उक्त गोलले केही राहत मिल्ने थियो ।
अब पिएसजीले उपाधिका लागि इन्टर मिलानसँग प्रतिस्पर्धा गर्नेछ । इन्टरले बार्सिलोनालाई हराउँदै फाइनलमा स्थानमा सुरक्षित गरिसकेको छ । फाइनल खेल १ जुनमा जर्मनको म्युनिखमा हुनेछ ।
