काठमाडौं । नेपाल भ्रमणमा रहेका भारतीय जनता पार्टी (भाजपा)का विदेश विभाग प्रमुख विजय चौथाइवालेले राजनीतिक भेटवार्ता तीव्र पारेका छन् । उनले प्रधानमन्त्री, पूर्वप्रधानमन्त्रीदेखि विभिन्न राजनीतिक दलका नेताहरुसँग पालैपालो भेटवार्ता गरिरहेका छन् । चौथाइवाले तीन दिने भ्रमणका लागि नेपाल आएका हुन् ।
चौथाइवालेले आज प्रधानमन्त्री केपी शर्मा ओलीसँग प्रधानमन्त्री निवास बालुवाटारमा पुगेर भेटवार्ता गरेका छन् । भेटमा दुई देशबीचको आपसी सम्बन्ध र हितका विविध विषयमा छलफल भएको प्रधानमन्त्री ओलीको सचिवालयले जनाएको छ ।
बुधबार मात्र नेपाल आएका चौथाइवालेले दुई दिनभित्रै सत्तासिन र विपक्षी दलका गरेर प्रधानमन्त्री, तीन पूर्वप्रधानमन्त्रीसहित एक दर्जनभन्दा बढी नेतालाई भेटिसकेका छन् । बुधबार गृहमन्त्री रमेश लेखकलाई भेटेर सुरु भएको दौडधुप बिहीबार साँझसम्मै जारी रह्यो । बुधबार चौथाइवालेले लेखकका अलावा कांग्रेस पार्टीका सभापति शेरबहादुर देउवा र परराष्ट्रमन्त्री आरजु राणा देउवा र राति अबेर गरी कांग्रेस नेता शेखर कोइरालासँग डिनर भेटवार्ता गरेका थिए ।
उनले आज बिहानैदेखि फेरि भेटवार्ता सुरु गरे । माओवादी अध्यक्ष एवं पूर्वप्रधानमन्त्री पुष्पकमल दाहाल र एकीकृत समाजवादीका अध्यक्ष एवं पूर्वप्रधानमन्त्री माधवकुमार नेपालसँग उनले छुट्टाछुट्टै भेटवार्ता गरे । कांग्रेस महामन्त्री गगन थापा, कांग्रेस नेता प्रकाशशरण महत र उदयशमशेर राणासँग पनि उनले बेग्लाबेग्लै भेटे । त्यस्तै उनले माओवादी नेता जनार्दन शर्मालाई पनि छुट्टै भेटेका छन् ।
चौथाइलालेले मधेसी मोर्चाका नेताहरुसँग पनि भेट्ने कार्यक्रम छ । उनी भोलि नै स्वदेश फर्कने छन् ।
नेताहरुसँग के विषयमा उनले कुरा गरे भनेर सार्वजनिक भएको छैन । तर गतसाता जम्मु कश्मिरस्थित पहलगाममा नेपालीसहित २६ जनाको ज्यान जाने गरी गरिएको पर्यटनमाथिको आतंकवादी हमलाको पृष्ठभूमिमा यो भ्रमण भएको देखिन्छ । चौथाइवालेले आतंकवादको विरोधमा नेपालका नेताहरूको समर्थन कायम राख्ने प्रयास गरेका छन् ।
त्यसो त भारतले पाकिस्तानमाथि विभिन्न कडा कूटनीतिक कदमहरू चालिसकेको छ । त्यसले दुई देशबीच तनाव बढाएको छ । भारत र पाकिस्तानबीच तनाव बढ्दै गर्दा चौथाइवालेले नेपाल र यहाँका नेताहरूको साथ आतंकवादको विरोधमा भारतको पक्षमा कायम रहोस् भन्ने सन्देश दिन खोजेको बताइएको छ ।
